د لوړو زده کړو سرپرست وزیر په مشرۍ د خصوصي تحصیلي پوهنتونونو له استازو سره د هغوی د ستونزو حل په موخه ناسته وشوه
د لوړو زده کړو سرپرست وزیر په مشرۍ د دغه وزارت د رهبري شورا ناستو په تالار کې، د وزارت یو شمېر رییسانو او د خصوصي پوهنتونونو استازو تر منځ په یادو پوهنتونونو کې د یو شمېر ستونزو حل او له هغوی سره د دایمي استادانو ګمارنې په پروسو کې د اسانۍ په موخه ناسته ترسره شوه.
په پیل کې د لوړو زده کړو سرپرست وزیر محترم شیخ الحدیث مولوي نداء محمد ندیم په دنیوي او اخروي چارو کې پر عدالت ټینګار وکړ او ویې ویل چې د خلکو حقونو مراعاتول له خلکو سره عدالت دی او د الله تعالی اوامرو عملي کول او له نواهیو څخه یې ډډه کول له الله تعالی سره عدالت دی.
محترم شیخ صاحب وویل چې پر جنایت کوونکي رحم کول جنایت ته لار هوارول دي او موږ په هغه صورت کې له جنایت کوونکي سره اساني کولی شو، چې ټولنې ته پکې زیان نه وي.
وروسته د غونډې ګډونوالو په خصوصي پوهنتونونو کې د دایمي استادانو اړوند پروسو په اړه بحثونه او لازمې پرېکړې وکړې.
نېټه: یکشنبه
۱۴۴۶ هـ.ق د شوال المکرم ۱۵ مه
۱۴۰۴ هـ.ش د وري ۲۴ مه
۲۰۲۵ م د اپرېل ۱۳ مه
