د لوړو زده کړو سرپرست وزیر په مشرۍ د خصوصي لوړو زده کړو کمیسیون ناسته وشوه
د ناستې په پیل کې د لوړو زده کړو سرپرست وزیر محترم شیخ الحدیث مولوي نداء محمد ندیم وویل چې لوړو زده کړو وزارت د خصوصي پوهنتونونو کیفیت لوړونې او پرمختګ ته ژمن دی او زیاته یې کړه: «موږ د امارتي تحصیلي نهادونو په شان د خصوصي تحصیلي نهادونو ملاتړ او څارنه کوو.»
همدارنګه له اجنډا سره سم د کمیسیون غړو د خصوصي تحصیلي نهادونو د مالي حالت ښه والي اقتصادي طرحې مطابق د دایمي استادانو اسنادو طی مراحل کولو، د یو شمېر خصوصي پوهنتونونو له لوري د پوهنځیو او څانګو د ایجاد او تعدیل وړاندیزونو او د څانګو نومونو بدلولو او همدارنګه د یادو نهادونو اړوند پر یو شمېر نورو موضوعاتو هر اړخیز بحثونه او پرېکړې وکړې، د ځينو موضوعاتو د څېړنې او څرنګوالي مشخصولو په پار، کمېټې جوړې او ځانګړې دندې ورته وسپارل شوې.
د یادونې وړ ده چې د خصوصي لوړو زده کړو کمیسیون د دغو نهادونو د ستونزو حل په موخه جوړ شوی، چې د لوړو زده کړو وزارت معین صاحبان، د وزارت سلاکاران، د مرکزي ادارو یو شمېر رئیسان، د مرکزي امارتي پوهنتونونو رئیسان او د خصوصي پوهنتونونو استازي یې غړیتوب لري.
نېټه: سه شنبه
۱۴۴۶هـ.ق، د رجب المرجب ۶مه
د ۱۴۰۳هـ.ش، د جدی ۱۸مه
۲۰۲۵م، د جنوري ۷مه
