د لوړو زده کړو سرپرست وزیر په مشرۍ د لوړو زده کړو وزارت رهبري شورا غونډه ترسره شوه او د مطرح شویو موضوعاتو په اړه بحث او لازم تصمیمونه ونیول شول.
د غونډې په پیل کې د لوړو زده کړو سرپرست وزیر شیخ الحدیث مولوي ندا محمد ندیم صاحب د لوړو زده کړو وزارت په اهدافو، دیني مسؤلیتونو او دندو رڼا واچوله او ویې ويل، چې دا د لوړو زده کړو وزارت مسؤليت دی، چې د خداى (ج) فرمانونو، ملي ارزښتونو او د هېواد د اړتياوو په نظر کې نيولو سره هېوادوالو ته تحصيلي خدمات وړاندې کړي، چې د لوړو زده کړو وزارت یې په نظر کې نیولو سره فعاليت کوي.
سرپرست وزیر همداراز د عصري علومو پر اړتیا او په اړوندو بستونو کې د مسلکي کسانو د ګمارنې په اړه هم خبرې وکړې او د هېواد په تحصیلي نظام کې یې د کار او تدریس پر کیفیت ټینګار وکړ.
ورپسې د اجنډا له مخې د شورا د تېرو پرېکړو د کړنو راپور او د ترسره شویو فعالیتونو څرنګوالی په اړه د شورا غړو ته معلومات وړاندې شول، چې په تعقیب یې د دیني علومو په برخو کې د استادانو د ظرفیت لوړولو لپاره د پروګرامونو جوړولو، د محصلینو د تبدیلۍ بهیر، د لوړو زده کړو له خصوصي مؤسسو سره د ګډ کمیسیون جوړولو، د لوړو زده کړو وزارت او د تخنیکي او مسلکي زده کړو ادارې ترمنځ د ګډې کمېټې د کار پر دوام او نورو موضوعاتو په اړه بحث او د نظریاتو تبادله وشوه او لازم تصمیمونه ونیول شول.
نېټه: چهارشنبه
۴/۵/۱۴۴۴ هـ ق ۷/۱۰/۱۴۰۱ هـ ش ۲۸/۱۲/۲۰۲۲ م
