د لوړو زده کړو سرپرست وزیر یو تن استاد چې د مالیزیا اسلامي نړیوال پوهنتون په پنځه دیرشمه لمانځغونډه کې يې د طب ماسټري برخه کې د غوره محصل جایزه تر لاسه کړې وه وستايه
د لوړو زده کړو سرپرست وزیر او علمي مرستیال پوهنمل عبدالتواب بالاکرزي په داسې حال کې چې د کابل طبي علومو ابوعلي ابن سینا پوهنتون رئیس دوکتور وحیدالله مومند، د لوړو زده کړو سلاکار پوهنوال غلام دستګیر خاورین او د دې وزارت یو شمیر رئیسانو حضور درلود، د کابل طبي علومو پوهنتون استاد دوکتور عبد الله اسعدي په تقدیرولو او تشویقولو سره وویل، هغه کسان چې له تحصیلي او زده کړه ییزو نړیوالو ډګرونو څخه ډک لاسونه هېواد ته راګرځي د اکاډمیکې ټولنې ویاړ باله شي.
پوهنمل عبدالتواب بالاکرزي، د نړۍ له معتبرو پوهنتونو څخه د استادانو زده کړې ترلاسه کول او بیرته راتګ په هیواد کې د پوهنتونو لپاره د بدلونونو یوه ښه دریڅه وبلله او ویې ویل: «په تمه یو د هغه څه پایلې چې افغان استادانو په نورو هیوادونو کې زده کړي په خپل علمي چاپيریال کې یې په ښکاره توګه ووینو.»
د لوړو زده کړو سرپرست وزیر استاد اسعدي ته د ستاينلیک په ورکولو سره، دغه بریالیتوب یو ویاړ وباله او زیاته یې کړه: «دغه لاسته راوړنه په علمي ټولنې پورې اړه لري او له هغو استادانو څخه مننه کوم چې له خپل هیواده بهر په علمي چاپيریال کې ځلیږي او په ډک لاس هیواد ته راځي او خپل نیک نوم پر ځای پریږدي.»
پوهنیار دوکتور عبدالله اسعدي د خپلو خبرو پرمهال وویل چې د مالیزیا اسلامي نړیوال پوهنتون لمانځغونډه کې د ممتاز محصل په عنوان دده ټاکلو او د لوړو زده کړو وزارت له لوري ورته تقدیرنامه ورکولو دده د مسؤولیت احساس او ملت ته د خدمت کولو ژمنه پیاوړي کړې ده. نوموړي وویل چې تر ټولو لوی ویاړ یې ملت ته چې ورباندې زیات حق لري، په ریښتنولۍ سره خدمت کول دي
