د لوړو زده کړو وزارت او عامه محافظت د تصدۍ ریاست تر منځ، امنیتي همکاريو هوکړه لاسلیک شوه
د مرکز تحصيلي بنسټونو او لوړو زده کړو وزارت عالي مقام د غوره امنیت په پار د لوړو زده کړو وزارت او عامه محافظت د تصدۍ ریاست تر منځ هوکړه لیک لاسلیک شو.
د دغې هوکړې پر بنسټ به تر دې وروسته د څلورو مرکزي دولتي پوهنتونونو او لوړو زده کړو وزارت امنیتي چارې، د عامه محافظت د تصدۍ ریاست پر غاړه وي.
د لوړو زده کړو وزارت مالي او اداري معین نور احمد دروېش د هوکړې پر مهال په هېواد کې د تحصیلي بنسټونو د امنیت پر ارزښت او د هوکړې د موادو پر پلي کولو یې ټینګار وکړ.
هغه زیاته کړه چې لوړو زده کړو وزارت د وطن بچیانو لپاره د روزنې ارام چاپېریال دی او اوسمهال تر پخوا زیات امنیتي اقداماتو ته اړتیا لري، چې له نېکه مرغه د ولسمشرۍ عالي مقام له سپارښتنې سره سم د هېواد تحصیلي بنسټونو مسوولیت د عامه محافظت د تصدۍ ریاست ته ورسپارل شوی دی.
مالي او اداري معین وویل، چې په لومړي ګام کې به د مرکز څلورو پوهنتونونو امنیتي چارې د عامه محافظت د تصدۍ ریاست ته وروسپارل شي او وروسته به نور پوهنتونونه هم په دغه پروسه کې شامل شي.
ښاغلي دروېش له ملي پولیسو څخه چې مخکې تر دې یې د تحصیلي بنسټونو د امنیت چارې سمبالولې، مننه وکړه او د تحصیلي بنسټونو د یوه ځانګړي امنیتي بېس پر جوړولو یې ټینګار وکړ ترڅو له دې لارې د یوې واحدې قوماندې او مدیریت تر چتر لاندې د هېواد د پوهنتونونو امنیتي چارې مدیریت شي.
همدارنګه د عامه محافظت د تصدۍ ریاست باصلاحیته استازي ژمنه وکړه چې دغه ریاست د مسلکي ځواکونو او غوره امنیتي سیسټم په درلودو سره به د لوړو زده کړو وزارت او مرکز دولتي تحصیلي بنسټونو د امنیت د ټینګښت په برخه کې په خپل ټول توان سره هڅه وکړي. دغه راز د استادانو، زدکړیالانو او کارکوونکو لپاره به ارامه تحصیلي فضا رامنځته کړي.
