د لوړو زده کړو وزارت د تضمین کیفیت او اعتبار ورکونې سرپرست رییس د هرات پوهنتون له تدریسي او اداري برخو لیدنه وکړه.
۱۴۰۰کال، د مرغومې ۲۷مه
د لوړو زده کړو وزارت د تضمین کیفیت او اعتبار ورکونې سرپرست رییس د هرات پوهنتون له تدریسي او اداري برخو لیدنه وکړه.
د لوړو زده کړو وزارت د تضمین کیفیت او اعتبار ورکونې سرپرست رییس شاکرالله وحیدي او په هرات پوهنتون کې د لوړو زده کړو وزارت ځانګړي استازي مولوي منت الله آخوندزاده د هرات پوهنتون له تدریسي خونو او مختلفو پوهنځیو څخه لیدنه وکړه او د یاد پوهنتون له مسوولانو سره یې وکتل.
په دغه لیدنه کې ښاغلي وحیدي د دولتي تحصیلي بنسټونو د بیا پرانیستلو په اړه د لوړو زده کړو وزارت لیدلوری تشریح کړ او ویې ویل، چې لوړو زده کړو وزارت په دې هڅه کې دی، چې د اقتصادي ستونزو په له منځه وړلو او د دیني او افغاني ارزښتونو په مراعاتولو سره به د ټولو ښځينه او نارینه زده کړیالانو پر مخ دولتي پوهنتونونه پرانیستل شي.
همدارنګه د هرات پوهنتون د زده کړیالانو چارو مرستیال او د دغه پوهنتون سرپرست دوکتور محمد داود منیر د لوړو زده کړو وزارت له پلاوي سره د خپلو علمي او اکاډمیکو پروګرامونو راپور شریک کړ او دغه پوهنتون ته یې د لوړو زده کړو وزارت د مسوولانو د لا ډېرې پاملرنې غوښتنه وکړه.
