د لوړو زده کړو وزارت سرپرست د کابل ترهګريز بريد له ځاى څخه ليدنه وکړه
د لوړو زده کړو وزارت سرپرست ډاکټر عباس بصير د امنيتي ځواکونو د عملياتو تر پاى ته رسېدو وروسته د کابل ترهګريز بريد له ځاى څخه ليدنه وکړه.
د لوړو کړو وزارت سرپرست او نوماند وزير ډاکټر عباس بصير د ننني بريد له ځاى څخه چې په هغه کې يوشمېر زده كړيالانو ته مرګژوبله واوښته؛ ليدنه وکړه او د ياد ترهګريز بريد له غندلو سره سره يې هغه د بشر ضد ستر جنايت وباله.
د لوړو زده کړو وزارت سرپرست نن د بريد له ځاى څخه د ليدو پرمهال زياته کړه چې پر تحصيلي مرکزونو بريد يو غيرانساني عمل او له ټولو ملي او نړيوالو قوانينو سره په ټکر کې دى.
د لوړو زده کړو وزارت سرپرست همداراز علي آباد روغتون کې د نن ورځې د بريد د ټپيانو ليدنه وکړه او له طبي کارکوونکو يې د لاپاملرنې غوښتنه وکړه.
د علي اباد روغتون رييس د ټپيانو حالت ښه وباله او د لوړو زده کړو وزارت سرپرست ته يې ډاډ ورکړ چې ټولو ټپيانو ته به جدي رسيدګي کېږي.
له دې سره د لوړو زده کړو وزارت سرپرست د يوشمېر ټپيانو له کورنيو سره ليدنه او همداراز ژمنه وکړه چې ټپيانو ته به جدي پام کېږي.
