د لوړو زده کړو وزارت علمي معین او د کور او ښار جوړولو وزارت د ښاري چارو معین تر منځ د دوه اړخیز هوکړه لیک پر عملي چارو بحث وشو.
د لوړو زده کړو وزارت علمي معین دوکتور لطف الله خیرخواه په خپل کاري دفتر کې، په داسې حال کې چې د کابل او کابل پولي تخنیک پوهنتونونو مشرتابه پلاوي هم حضور درلود، د کور او ښار جوړولو وزارت د ښاري چارو معین شیخ مدار علي کریمي بامیاني او ورسره مل پلاوي سره د دوه اړخیز هوکړه لیک د عملي کولو پر څرنګوالي مفصلي خبرې وشوې.
د یاد دوه اړخیز هوکړه لیک پر اساس، چې مخکې لاسلیک شوی، د لوړو زده کړو وزارت اړوند امارتي تحصیلي بنسټونو محصلین کولی شي، چې د کور او ښار جوړونې وزارت په پروژو کې عملي زده کړې وکړې او همدارنګه لوړو زده کړو وزارت به د خپلو پوهنتونونو په انجنیري پوهنځیو کې د کور او ښار جوړولو وزارت د کار کوونکو لپاره د ظرفیت لوړونې زمینه برابروي.
همدارنګه په دې ناسته کې د لوړو زده کړو او ښار جوړولو وزارت معین صاحبانو خپلو اړوندو رئیسانو ته دنده وسپارله چې د یاد هوکړه لیک د موادو د تطبیق په برخه کې لازم او چټک اقدامات وکړي.
د یادونې وړ ده چې لوړو زده کړو وزارت د محصلینو د عملي زده کړو په خاطر له نورو ادارو او وزارتونو سره هم ورته هوکړې لاسلیک کړي دي.
