د لوړو زده کړو وزارت علمي معین د التقوا لوړو زده کړو موسسې له لوري د علمي څېړنيزو مرکزونو د جوړولو او معرفي کولو عمومي طرحې د وړاندې کولو په غونډه کې ګډون وکړ.
د غونډې په پیل کې چې د مرکزي پوهنتونونو د استازو په ګډون جوړه شوې وه، د لوړو زده کړو وزارت علمي معین دوکتور لطف الله خیرخواه د هېواد په تحصیلي بنسټونو کې د څېړنیزو مرکزونو پر ارزښت او اړتیا خبرې وکړې.
هغه وویل، د هېواد د څېړنیزو پروګرامونو ارزښت او اړتیا ته په کتو، د لوړو زده کړو وزارت تېر کال په ۲۵ تحصیلي بنسټونو کې د څېړنو معاونیتونه رامنځته کړل، څو په هغو څېړنیزو پروژو کار وکړي چې زموږ هېواد ورته اړتیا لري.
ورپسې د التقوا لوړو زده کړو موسسې مسوولینو خپل وړاندیز شوې طرحه وړاندي کړه، چې د څېړنیزو مرکزونو د جوړولو څرنګوالي، اړتیاوو، ګټو او نورو موضوعاتو په اړه د غونډې د غړو له خوا پرې هر اړخیز بحثونه وشول.
د غونډې په پاى کې د لوړو زده کړو وزارت علمي معین د یادې موسسې له مسوولينو څخه د مننې ترڅنګ له هغوى وغوښتل چې د ټولنيزو او طبيعي علومو په څانګو کې پر يوه مشخص موډل کار وکړي او په راتلونکې غونډه کې يې وړاندې کړي.
