د لوړو زده کړو وزارت علمي معین د ١٨ میلیونه افغانیو په ارزښت د البيروني پوهنتون د احاطې دېوال جوړولو د بنسټ ډبره کېښوده.
په همدې موخه جوړې شوې غونډه کې چې د یاد پوهنتون مشرتابه، علماوو، استادانو او د بېلابېلو ادارو رئیسانو ګډون درلود، د لوړو زدهکړو وزارت علمي معین دکتور لطف الله خیرخواه د وزارت پر لاسته راوړنو او پرمختګونو خبرې وکړې او ويې ویل چې د وزارت په تاريخ کې د لومړي ځل لپاره په پوهنتونونو کې د علمي څېړنو او مجلې معاونیتونه رامنځته شول، په پوهنتونونو کې د هېواد په کچه علمي کنفرانسونه جوړېږي او په بېلابېلو پوهنتونونو کې دې ته ورته پروژې پر لاره لوېدلې دي.
وروسته علمي معین او د البيروني پوهنتون رئیس لخوا د احاطې دېوال جوړولو د بنسټ ډبره کېښودل شوه.
د یادونې وړ ده، چې یاد دېوال ٢٦٠٠ متره اوږدوالی او ٦٠ سانتي بر لري او د پوهنتون ٣١٤ جريبه ځمکه راچاپېروي.
نېټه : چهارشنبه
۱۴۴۵/۴/۱۷ هـ.ق ۱۴۰۲/۸/۱۰ هـ.ش۲۰۲۳/۱۱/۱
