د لوړو زده کړو وزارت علمي معین د کابل ښوونې او روزنې پوهنتون د علمي شورا په غونډه کې ګډون وکړ او د هغوی غوښتنې او ستونزې یې واورېدې.
د غونډې په پيل کې د کابل ښوونې او روزنې پوهنتون علمي مرستيال پوهاند دوکتور جمشيد رشيدي د لوړو زده کړو وزارت علمي معین دوکتور لطف الله خيرخواه په شتون خوښي څرګنده کړه او د علمي شورا د غونډې اجنډا یې ولوستله.
ورپسې د غونډې غړو اجنډا سره سم په هېواد کې د تعلیمي او تحصیلي نظام د ښه والي او پیاوړتیا په اړه د ملي کنفرانس د جوړېدو د چمتووالي، د لوړو زده کړو او پوهنې وزارتونو ترمنځ په دې برخه کې د همکارۍ څرنګوالي، د استادانو د مقالو راټولولو، د مرکز او ولایتونو د تحصیلي بنسټونو د استادانواو د اړوندو ادارو د مسؤلینو په ګډون، د استادانو د دوسیو څیړلو، د کیفیت د تضمین په مسایلو، د مقالو د چاپ او خپرولو د بهیر ساده کولو او د نورو موضوعاتو په اړه بحث او لازم تصمیمونه ونیول.
پر دوام یې د لوړو زده کړو وزارت علمي معین د هېواد په مهمو او پرېکنده مسایلو کې د پوهنتونونو پر رول ټینګار وکړ، د هېواد په تحصیلي بنسټونو کې د ملي کنفرانسونو د جوړولو موخه، په مهمو ملي مسايلو کې د يادو تحصيلي بنسټونو د دريځ روښانه کولو او په دغو ادارو کې د لا زيات تحرک رامنځته کول روښانه کړل.
ښاغلي خيرخواه د ښوونې او روزنې د پوهنځيو له استادانو څخه وغوښتل، چې د کابل د ښوونې او روزنې پوهنتون د ملي کنفرانس د جوړولو په برخه کې تېر کنفرانسونه، چې په کابل او شیخ زاید پوهنتونونو کې ترسره شول، مطالعه کړي د هغوی د ضعف او قوت نقطې په ګوته کړي او د امکان تر حده ترې د خپل کنفرانس په ترسره کولو کې استفاده وکړي.
علمي میعن همدا راز زیاته کړه، چې د لوړو زده کړو وزارت په ټول توان سره د هېواد په تحصیلي بنسټونو کې د ملي کنفرانسونو له تنظیمولو څخه ملاتړ او حمایت کوي.
