د لوړو زده کړو وزارت علمي معین په خپل کاري دفتر کې د افغانستان لپاره د یونسکو تعلیمي څانګې رئیس او ورسره مل پلاوي سره وکتل

په دې کتنه کې د لوړو زده کړو وزارت علمي معین دوکتور لطف الله خیرخواه په علمي او اکاډمیکو برخو کې د دغه وزارت د وروستیو پرمختګونو او فعالیتونو د وړاندې کولو ترڅنګ د هېواد د تحصیلي سکتور د اړتیاوو په اړه معلومات ورکړل.
هغه وویل، لوړو زده کړو وزارت په تېرو دوو کلونو کې د خپلو امکاناتو په پام کې نیولو سره په تحصیلي بنسټونو کې د څېړنیزو معاونیتونو د رامنځته کولو، د څېړنیزو پروژو لپاره د بودیجې ځانګړی تخصیص، د ملي او بین المللي سمپوزیمونو د جوړېدو، د تحصیلي نصاب بیاکتنې او پراختیا، د ملي او نړيوالو ژورنالونو رامنځته کول او نورو برخو کې فعاليتونه ترسره کړي دي.
همداراز د لوړو زده کړو وزارت علمي معین د هېواد د تحصیلي سکتور د اړتیاوو او ستونزو په اړه هم خبرې وکړې او ویې ویل، چې زموږ تحصیلي بنسټونه د لابراتوارونو د تجهیز، د کتابتونونو جوړولو، په علمي او اکاډمیکو برخو کې د استادانو د ظرفیتونو د لوړولو، د استادانو د مسلکي پراختیا مرکزونو او په نورو برخو کې اړتیاوې لري. نوموړي د یاد سازمان له تعلیمي رئیس څخه وغوښتل چې په يادو برخو کې له لوړو زده کړو وزارت سره همکاري وکړي.
ورپسې د افغانستان لپاره د یونسکو سازمان تعلیمي څانګې رئیس انتوني ټام د لوړو زده کړو وزارت له وروستیو فعالیتونو څخه خوښي څرګنده کړه او د دې سازمان د امکاناتو او همکاریو په اړه يې معلومات ورکړل.
هغه وويل، چې د يونسکو سازمان لېواله دی، چې له لوړو زده کړو وزارت سره همکاري وکړي، چې اوسمهال کولای شي د استادانو د ظرفیت لوړونې، ملي او نړيوالو ژورنالونو او نورو څانګو کې مرسته وکړي. نوموړي دغه راز د نورو نړيوالو سازمانونو د مرستو د جلبولو په برخه کې د همکارۍ ژمنه وکړه.