د لوړو زده کړو وزارت علمي معین په پولي تخنیک پوهنتون کې د (اوبو نړیوال کنفرانس-کابل) د جوړیدو په اړه د امارتي تحصیلي بنسټونو علمي مرستیالانو سره انلاین ناسته وکړه.
د ناستې په پیل کې د لوړو زده کړو وزارت علمي معین دوکتور لطف الله خیرخواه وویل: «د افغانستان د تحصیلي بهیر په تېر ۹۰ کلن تاریخ کې تحصیلي مرکزونه یا خپل رسالت ته پرېښودل شوي نه دي او یا یې چا خبره منلې او اورېدلې نه ده، چې له امله یې دوی خپل اساسي رسالت کې له خڼد سره مخ وو».
علمي معین دغه راز اوبه یوه نړیواله حیاتي مسئله یاده کړه او ویې ویل، چې همدې ارزښت ته په کتو مو دغه کنفرانس په نړیواله کچه پلان کړی او د مسلکي ادرس په توګه مو د کنفرانس کوربتوب د کابل پولي تخنیک پوهنتون ته ورکړی دی.
دغه راز په یاده ناسته کې د کابل پولي تخنیک پوهنتون رئیس او مسؤلینو، د وزارت د څېړنې، تالیف او ژباړې رئیس په حضوري او د امارتي تحصیلي بنسټونو علمي مرستیالانو او استازو هم په انلاین بڼه ګډون کړی و چې د کنفرانس د ښه مدیریت او لا معیاري کولو په اړه یې له یو بل سره نظریات او وړاندیزونه شریک کړل.
په پام کې ده چې (د اوبو نړیوال کنفرانس-کابل) د لوړو زده کړو وزارت د څېړنې، تالیف او ژباړې ریاست د پلان سره سم په کابل پولي تخنیک پوهنتون کې د روان کال جوزا میاشتې په لومړۍ نېټه پیل او د ملي او نړیوالو څېړنیزو مقالو په وړاندې کولو سره د درې ورځو په موده کې ترسره شي.
