د لوړو زده کړو وزارت مالي او اداري معین د وزارت له کارکوونکو سره په کتنه کې له هغوی وغوښتل چې خپلو کارونو ته زیاته پاملرنه وکړي او د نن کار سبا ته پرېنږدي.
د لوړو زده کړو وزارت مالي او اداري معین مولوي حافظ محمد حامد حسیب په هغه کتنه کې چې د لوړو زده کړو وزارت له کارکوونکو سره یې درلوده، د کارکوونکو د کاري چارو پر دقت او چټکتیا ټینګار وکړ.
هغه زیاته کړه: د شکر ځای دی، چې له یوې خوا الله تعالی موږ ته په یوه علمي او اکاډمیک بنسټ کې د خلکو د خدمت کولو فرصت راکړی او له بلې خوا یې د حلال رزق د ترلاسه کولو زمینه هم برابره کړې ده.»
نوموړي دغه راز وويل، چې د ا.ا.ا په ځانګړي ډول د لوړو زده کړو وزارت مشرتابه تل د کارکوونکو د اقتصادي حالت د ښه والي لپاره هڅې کړي چې له نېکه مرغه په دې برخه کې بريالي شوي او د وزارت د کارکوونکو معاشونه لوړ شوي دي.
د لوړو زده کړو وزارت مالي او حسابي رئیس عبدالباري خپلواک هم په دې اړه خبرې وکړې او د دغه وزارت د کارکوونکو د مالي امتیازاتو په اړه یې معلومات ورکړل او له هغوی یې وغوښتل چې په هر ډول شرایطو کې د تحصیلي نظام پیاوړي کولو ته کار وکړي.
