د لوړو زده کړو وزارت مشرتابه شورا ناسته ترسره شوه
د لوړو زده کړو وزارت مشرتابه شورا ناسته د دغه وزارت د سرپرست شېخ عبدالباقي حقاني په مشرۍ وشوه.
په دغه ناسته کې علمي، مالي او اداري او د زدکړیالانو چارو معینانو، د مرکزي پوهنتونونو رییسانو، د لوړو زده کړو وزارت مرکزي ادارو رییسانو او همدارنګه د ولایتونو د پوهنتونونو رییسانو په انلاین ډول ګډون کړی وو.
د ناستې په پیل کې د لوړو زده کړو وزارت سرپرست شېخ عبدالباقي حقاني د پوهنتونونو د حضوري زده کړو د پیل پر هڅو خبرې وکړې.
وروسته له اجنډا سره سم، د ګډ تحصیلي نظام د بېلوالي د طرحې، په دولتي لوړو زده کړو پوهنتونونو او موسسو کې د حضوري درسونو د پیل او همدارنګه د ۱۴۰۰کال، د روان تحصیلي سمسټر د مهالوېش په اړه خبرې وشوې او نظرونه سره شریک شول.
له هر اړخیزو بحثونو وروسته د ناستې غړو پرېکړه وکړه چې د لوړو زده کړو بنسټونو مسوولان به د هېواد پوهنتونونو اسانتیاوو ته په کتو، د هلکانو او نجونو د بېلوالي، د حضوري درسونو د پیل د څرنګوالي او د نویو زدکړیالانو د جذب په اړه په راتلونکو درېیو ورځو کې خپلې طرحې د لوړو زده کړو وزارت له مشرتابه سره شریکې کړي.
