د لوړو زده کړو وزارت معین په خپل کاري دفتر کې، د افغان الاصل الماني متخصص سلطان مسعود دقیق سره چې د بشردوستانه او پرمختیایي پروژو په برخه کې د نړیوالو تجربو درلودونکي دی وکتل.
سه شنبه، ۱۷ کب ۱۴۰۰
د لوړو زده کړو وزارت معین په خپل کاري دفتر کې، د افغان الاصل الماني متخصص سلطان مسعود دقیق سره چې د بشردوستانه او پرمختیایي پروژو په برخه کې د نړیوالو تجربو درلودونکي دی وکتل.
د لوړو زده کړو وزارت علمي معین دوکتور لطف الله خیرخواه هېواد ته د نوموړي په راتګ خوښي څرګنده کړه او یې ویل: « زموږ د هېواد زیربناوې د څلورو لسېزو جګړو په بېلابېلو برخو او په ځانګړې توګه تعلیمي او تحصیلي برخو کې سختې زیانمنې شوې دي، چې دا بیا رغونې او جوړونې ته اړتیا لري.»
هغه زياته کړه، چې په تېرو شلو کلونو کې هېواد ته د ميليونونو ډالرو له راتګ سره سره پر بنسټيزو او عام المنفعه پروژو سمه پانګونه نه ده شوې او ورکړل شوې پيسې ضايع شوې دي.
د لوړو زده کړو وزارت علمي معین دغه راز وویل، په اوسنيو شرايطو کې هېواد مو د پرمختګ او عامه هوساينې لپاره متخصصو افغانانو ته اړتيا لري، څو د هېواد د ابادۍ لپاره په ګډه کار وکړو.
دوکتور لطف الله خیرخواه د لوړو زده کړو وزارت د اړتیاوو په اړه هم خبرې وکړې او ویې ویل، چې په لومړي ګام کې د هېواد د کادري روغتونونو سمبالول او اکمالول زموږ لومړیتوب دی، ترڅو د طبي خدمتونو په برخه کې د خپلو محصلینو او خلکو اړتیاوې پوره کړو.
بیا افغان الاصل الماني متخصص سلطان مسعود دقیق د لوړو زده کړو له وزارت څخه مننه وکړه او ویې ویل، چې هېواد ته یې د سفر موخه د افغانستان د عاجلو اړتیاوو په اړه د معلوماتو راټولول، په دې برخه کې د المان د مرستو همغږي کول او راجلبول دي.
ښاغلي دقیق دغه راز د لوړو زده کړو وزارت له علمي معین څخه وغوښتل، چې موضوع ته په کتلو خپل لومړني ضرورتونه په لیکلي بڼه ورته وسپاري، ترڅو نوموړی یې له الماني چارواکو او خیریه بنسټونو سره شریک کړي.
د یادونې وړ ده چې سلطان مسعود دقیق له ۳۸ کلونو وروسته له جرمني څخه خپل هېواد ته راغلی دی. نوموړی یو له هغو افغانانو څخه دی چې په اسیايي او افریقايي هېوادونو کې د بشري او نړیوالو پرمختیايي پروژو په پلي کولو کې کافي تجربه لري.
ښاغلی دقیق هغه لومړنی افغان و چې په ۱۳۹۴ کال کې یې د المان له ولسمشر څخه د لیاقت مډال ترلاسه کړی دی.
