د لوړو زده کړو وزارت نوي مشرتابه، د دغه وزارت له کارکوونکو سره وکتل
د لوړو زده کړو وزارت نوي مشرتابه، د دغه وزارت له کارکوونکو سره وکتل او د کاري پروسې د پیل د څرنګوالي په اړه یې خبرې ورسره وکړې.
د لوړو زده کړو وزارت سرپرست شیخ عبدالباقي حقاني، په داسې حال کې چې د دغه وزارت معینانو هم حضور درلود، په دغه وزارت کې د کارونو له نسبي پیل خوښي وښوده او لوړو زده کړو وزارت یې د افغانستان له مهمو ادارو وباله.
هغه وویل چې لوړو زده کړو وزارت مهم مسوولیت پر غاړه لري، چې د هېواد د بچیانو روزنه او د علمي زېرمو ځواکمنول دي.
د لوړو زده کړو وزارت سرپرست زیاته کړه، چې افغانستان د ټولو افغانانو ګډ کور دی او موږ ټول دا مسوولیت لرو، چې خپل هېواد ودان کړو او د بهرنیانو له احتیاج څخه یې راوباسو.
دغه راز شیخ حقاني وویل چې له مراجعینو سره سمه رویه، حاضرۍ ته ژمنتیا، له اخلاقي او اداري فساد څخه لیرې والی او د ملي او دیني ارزښتونو په رڼا کې د کار چټکتیا هغه موارد دي، چې ټول باید ځانونو ورسره عیار کړو.
د لوړو زده کړو وزارت سرپرست، استادان او زده کړیالان د هېواد ملي شتمني وبلل او د وزارت له کارکوونکو یې وغوښتل چې د هغوی د ستونزو د حل پر مهال په ډېر درناوي او حوصلې چلن ورسره وکړي.
همدارنګه په دغه ناسته کې د علمي معینیت سرپرست انجینر روح الله روحاني، د زده کړیالانو چارو د معینیت سرپرست انجینر سید اسماعیل روحاني او د مالي او اداري معینیت سرپرست مولوي اسدالله فرید هم په دغه وزارت کې د کاري پروسې په اړه خبرې وکړې.
