د لوړو زده کړو وزارت وزیر په مشرۍ د خصوصي لوړو زدهکړو کمیسیون ناسته وشوه.
په پیل کې د لوړو زده کړو وزارت وزیر شیخ الحدیث مولوي نداء محمد ندیم په یاده غونډه کې، د خصوصي تحصیلي بنسټونو د تحصیلي چارو پر کیفیت لوړونه ټینګار وکړ او دغه کمیسیون یې د یادو بنسټونو د ستونزو حل او د چارو منظموالي لپاره مهم وباله.
وروسته له اجنډا سره سم د کمیسیون د غړو له لوري د یو شمېر خصوصي تحصیلي بنسټونو د پوهنځیو او څانګو نوي ایجاد غوښتنو، له یوه ځای څخه بل ځای ته د لېږد، د پوهنځيو او څانګو د نومونو تعدیل، د امناء پلاوي تائید او د هغوی د غوښتنو پر شرایطو بحثونه او لازمې پرېکړې وشوې او یو شمېر موضوعات له تایید وروسته د نهایي پرېکړې په پار، عالي شورا ته ولېږدول شول.
د یادونې وړ ده چې د خصوصي لوړو زدهکړو کمیسیون د یادو بنسټونو د ستونزو حل، پرمختګ او معیاري کولو په موخه جوړ شوی، چې د لوړو زده کړو وزارت معین صاحبان، د مقام سلاکاران، د مرکزي ادارو یو شمېر رئیسان او د مرکزي امارتي پوهنتونونو رئیسان یې غړیتوب لري.
