د لوړو زده کړو وزارت پلاوي بلخ ولایت ته د خپل سفر په درېیمه ورځ په بلخ کې له لوړو زده کړو څخه د محلي ادارې د ملاتړ په موخه د دغه ولایت له والي سره وکتل.
29/1/1444
5/5/1401
په دغه لیدنه کې د لوړو زده کړو وزارت د خصوصي محصلانو چارو رئیس انجنیر سید اسماعیل روحاني، په داسې حال کې چې د دغه وزارت د علمی پروګرامونو د پراختیا رئیس انجنیر روح الله روحاني او مالي او حسابي رئیس عبدالباري خپلواک هم حضور درلود، د بلخ له والي سره وکتل او په دغه ولایت کې یې د تحصیلي سکټور پر ځواکمنتیا خبرې وکړې.
انجنیر روحاني د هېواد د پرمختګ او ځان بساینې په برخه کې د لوړو زده کړو ارزښت ته په اشارې سره، د هېواد د تحصیلي بنسټونو د پرمختګ او پراختیا لپاره د لوړو زده کړو وزارت د پراختیایي پلانونو او پروګرامونو په اړه هر اړخیز معلومات وړاندې کړل.
د بلخ والي محترم مولوي قدرت الله حمزه د لوړو زده کړو وزارت پلاوي ته د ښه راغلاست تر څنګ، له نوموړي پلاوي سره د بلخ پوهنتون نیمه کاره پروژو د تکمیل ستونزه او د پوهنتون د استادانو د غصب شوو نمرو د بېرته راګرځولو موضوع شریکه کړه او په دغه ولایت کې یې د لوړو زده کړو وزارت د پروګرامونو د پلي کولو په برخه کې د پوره همکارۍ ډاډ ورکړ.
