د لوړو زده کړو وزیر دوکتور عباس بصیر په خپل دفتر کې د المپیک ملي کمېټې له رییس سره وکتل
په دغه لیدنه کې په داسې حال کې چې په ولسي جرګه کې د خلکو استازې روبینا جلالي هم وه، دواړو اړخونو د هېواد په تحصیلي بنسټونو کې د سپورټ عامولو، د لوبغالو تجهیز، د ماسټرۍ پروګرامونو جوړولو، سپورټي لوبغاړو ته د زده کړو لار هوارولو او د بېلابېلو لوبو استادانو د ظرفیت لوړولو په برخه کې د یوه هوکړه لیک پر لاسلیکولو هراړخیز بحث وکړ.
د لوړو زده کړو وزیر دوکتور عباس بصیر د المپیک ملي کمېټې له مشرتابه پلاوي مننه وکړه او په تحصيلي بنسټونو کې د لوبو عامولو په برخه کې یې د دغه وزارت د پروګرامونو په اړه وینا وکړه.
دوکتور عباس بصیر لوبې په هېواد کې د یووالي سمبول وبللې او ویې ویل:"په دې وروستیو کلونو کې د لوبغاړو لاسته راوړنې د دې لامل شوې چې زموږ د خلکو په وچو شونډو مسکا راولي او خلکو هم له هر ډول نسبت پرته د دوی تود هرکلی وکړ."
هغه زیاته کړه چې لوړو زده کړو وزارت ځینې پروګرامونه په پلان کې لري، چې پر بنسټ به یې وکولی شي په پوهنتونونو کې لوبې عامې کړي او د المپیک ملي کمېټه په دې برخه کې همکاري کولی شي.
ورپسې د هېواد د المپیک ملي کمېټې رییس دوکتور حفیظ الله ولي رحیمي د زده کړو تر څنګ د لوبو پر ارزښت او په دې برخه کې د المپیک ملي کمېټې د همکاریو په اړه وینا وکړه.
هغه وویل چې په نړۍ کې په لوړو کچه پوهنتونونه د اصلي لوبغاړو د راپورته کېدو ځایونه دي او که علمي مرکزونو ته پاملرنه وشي نو ټولنې ته به تکړه لوبغاړي وړاندې کړي.
همدارنګه په ولسي جرګه کې د خلکو استازې روبینا جلالي د لوړو زده کړو وزارت وروستي فعالیتونه او لاسته راوړنې وستایلې او د هېواد د لوبغاړو د ستونزو او غوښتنو په اړه یې وینا وکړه او د لوړو زده کړو له وزیر څخه یې وغوښتل چې د لوبغاړو لپاره په هېواد او له هېواد څخه بهر د زده کړو لار هواره کړي.
په پای کې پرېکړه وشوه چې د هېواد المپیک ملي کمېټه له لوړو زده کړو وزارت سره په سلا د دوه اړخیزو همکاریو د هوکړه لیک پر طرحې کار وکړي.
