د لوړو زده کړو وزیر د تحصیلي نظام پیاوړتیا په موخه د هیواد دولتي پوهنتونونو له رییسانو سره ویډیويي ناسته وکړه
د لوړو زده کړو وزیر نن په یوه ویډیويي ناسته کې د تحصیلي نظام پیاوړتیا په موخه د هېواد ټولو دولتي پوهنتونونو او لوړو زده کړو موسسو مشرانو او علمي مرستیالانو وړاندیزونه او ستونزې واورېدلې.
دغه ناسته کې د لوړو زده کړو وزیر دوکتور عباس بصیر سربېره د زدکړیالانو چارو معین پوهندوی سیدفرهاد شهیدزاده او د لوړو زده کړو وزارت یوشمېر مشرانو هم ګډون درلود. د لوړو زده کړو وزیر د دغې ناستې اصلي موخه د وزارت او پوهنتونونو تر منځ لا ښه همغږي او د وزارت مشرتابه په چارو کې د استادانو له نظرونو او تجربو څخه ګټه اخیستل یاد کړل.
د لوړو زده کړو وزیر وویل چې له ښوونیز څخه څېړنیز ته د تحصیلي نظام اړولو برخه کې یوشمېر ګامونه پورته شوي؛ خو په وینا یې دې برخه کې ډېر کار ته اړتیا ده او د لوړو زده کړو وزارت یې له خپلو لومړیتوبونو څخه بولي.
ښاغلي بصیر زیاته کړه چې د لوړو زده کړو وزارت پر دې کار کوي چې په هر پوهنتون کې د څېړنې یو معاونیت رامنځته شي. له دې سره د بحث بله موضوع الکټرونیکي زده کړې وې؛ چې د لوړو زده کړو وزیر یې د هېواد په کچه په پراخېدو ټینګار وکړ. ډاکټر عباس بصیر وویل چې د زده کړو الکټرونیکي کېدو په برخه کې ګامونه اخیستل شوي او دا به لاپیاوړي شي؛ ځکه چې له یوه لوري به د فساد مخنیوی او له بل لوري به د زدهکړو په بهیر کې روڼواالی لوړ شي.
د لوړو زده کړو وزیر په وینا تر دې مهاله له برېښنايي اړخه د تآلیف او ژباړې برخه کې کار شوی خو باید د بشري سرچینو، الکټرونیکي حاضرۍ او استادانو د ازموینه برخه کې هم لازم ګامونه پورته شي.
د دې تر څنګ د لوړو زده کړو وزارت د زدکړیالانو چارو مرستیال پوهندوی سیدفرهاد شهیدزاده هم ټینګار وکړ چې د روان سمسټر تر پای ته رسېدو وړاندې باید د پوهنځیو په کچه ټول استادان سره کېني؛ د تېر کال پر ستونزو او کمښت بحث او د ۱۴۰۰ کال لپاره خپل لیدلوري سره راغونډ او د لوړو زده کړو وزارت سره دې شریک کړي.
نوموړي همداراز وویل چې د عملي کار کولو په موخه هم د لوړو زده کړو وزارت له یوشمېر دولتي ادارو سره هوکړه لیکونه لاسلیک کړي او لاهم پر دې کار کوي چې څنګه زدکړیالان په عملي ډګر کې د تجربې ترلاسه کولو په موخه بېلابېلو ادارو ته وروپېژني.
په پای کې د غونډې ګډونوالو د دې ناستې جوړېدو له امله د وزارت له مشرتابه څخه مننه وکړه او پرېکړه وشوه چې تر دې وروسته به هره میاشت ورته ناسته جوړه شي.
