د لوړو زده کړو وزیر لوګر د لوړو زده کړو موسسه کې یوه څلور پوړیزه ودانۍ ګټې اخیستنې ته وسپارله
د لوړو زده کړو وزیر ډاکټر عباس بصیر او د دغه وزارت د مالي او اداري چارو معین نور احمد دروېش نن لوګر ولایت ته د خپل سفر پر مهال د یاد ولایت لوړو زده کړو موسسې کې یوه څلور پوړیزه ودانۍ ګټې اخیستنې ته وسپارله او همداراز یې د لوګر لوړو زده کړو موسسې د کرنې پوهنځي د څېړنیز فارم پروژه هم پرانیسته.
دغه ودانۍ په ټوله کې سل خونې لري چې د لوړو زده کړو وزارت پراختیا پروګرام یا (HEDP) په مالي همکارۍ د (۶۳) میلیونه افغانیو په لګښت جوړه شوې ده. د لوړو زده کړو وزیر ډاکټر عباس بصیر لوګر هغه ولایت وباله چې په وینا یې د تاریخ په اوږدو کې یې په نړیواله کچه نامتو علمي څېرې ټولنې ته وړاندې کړي دي.
نوموړي وویل چې په وروستیو کلونو کې هیواد کې د علم او پوهې کچه د پام وړ لوړه شوې چې ښه بېلګه یې په تحصیلي بنسټونو کې د محصلینو د شمېر لوړوالی دی او دا یوه ستره لاسته راوړنه ده.
ښاغلي ډاکټر عباس بصیر همداراز وویل چې لوګر د لوړو زده کړو موسسه به په پوهنتون بدله شي او په ټوله کې به د لوړو زده کړو وزارت هڅه دا وي څو د لوړو زده کړو په بنسټونو کې څېړنو ته ډېره پاملرنه وکړي.
له دې سره د لوړو زده کړو وزارت د مالي او اداري چارو معین نور احمد دروېش د هیواد په ټولو پوهنتونونو غږ وکړ چې د خپلو تحصیلي بنسټونو پرمختګ لپاره غوره ستراتېژيک پلان جوړ کړي څو ښه پراختیا وکړي؛ چې په وینا یې لوګر د لوړو زده کړو موسسه یو ښه ستراتېژیک پلان لري او وزارت کې یې پر بشپړېدو کار روان دی.
ښاغلي نور احمد دروېش زیاته کړه چې د لوړو زده کړو وزارت به د هیواد له بېلابېلو پوهنتونو څخه یوشمېر استادان د دوکتورا لپاره بهرنیو هیوادونو ته واستوي. د نوموړي په وینا دوی د پوهنتونونو د اداري او کادري برخو ستونزې هم په پام کې نیولي او هڅه کوي چې ژر تر ژره یې حل کړي.
لوګر ولایت ته په دې سفر کې د لوړو زده کړو وزیر او د مالي او اداري چارو مرستیال سربېره د دغه وزارت ځینو رییسانو او ولسي جرګه کې د یاد ولایت یوشمېر استازو هم ګډون لاره.
