د هرات پوهنتون د شرعياتو او حقوقو له پوهنځيو ۱۰۰ تنه فارغ التحصيلان وستايل شول
د هرات پوهنتون له حقوقو او شرعياتو پوهنځيو څخه هغه ۱۰۰ تنه فارغ التحصيلان چې د سترې محکمې په يو دېرشم قضايي ستاژ دوره کې بريالي شوي وو وستايل شول.
په دې دوره کې له ۹ زره ډېرو سيالي کوونکو ګډون کړی و چې د هرات پوهنتون د ۱۰۰ تنه فارغينو په ګډون ۳۰۰ تنه قضايي ستاژ ته بريالي شول.
د دې ستاژرانو د تقدير په محفل کې، د هرات پوهنتون رييس پوهنوال دوکتور عبدالله فايز، د قضايي ستاژ برياليو ته مبارکي وویله او په قضايي ستاژ کې يې د هرات پوهنتون د ۱۰۰ تنو محصلينو بريالي کېدل د دې بنسټ له پاره لويه لاسته راوړنه وبلله.
پوهندون عنايت الله صديقيار د احاديثو او ایتونو په استناد سره ځوان قاضيان عدالت کولو ته وهڅول او همداراز يې د هرات پوهنتون په شرعياتو او اسلامي علومو پوهنځي په چوکاټ او د فقهې او قضايي علومو په څانګه کې د ماسټرۍ د پيل کېدو زېری ورکړ.
د هرات ولايت د استيناف محکمې د رياست استازي قضاوتمند محمودالحسن روحاني ستاژرانو ته د دې بريا مبارکي وويله او هغه يې د استادانو د زړه سوي وړ زحمتونو پايله وبلله.
ورپسې د هرات ولايت د استيناف څارنوالۍ رييس څارنمل خواجه عبدالحق احمدي، د هرات ولايت د عدليې رييس پوهيالي سيد غلاماحمد رحماني، د حقوقو او سياسي علومو د پوهنځي استاد پوهنيار نصيراحمد صالحي او په لويديز زون کې د مدافع وکيلانو د خپلواکې ټولنې د نمايندګۍ رييس احمد رفيع نادري برياليو ستاژرانو ته د بريا د مبارکۍ تر څنګ د ستاژ د دې دورې په بريا کې د هرات پوهنتون د استادانو او حقوقي کلينيک کليدي رول د ارزښت وړ وباله.
په پای کې د دې دورې برياليو ته د يادګار په توګه د عدالت مډالونه ډالۍ کړل شول.
