د هېواد د لوړو زده کړو په تاریخ کې لومړي ځل لپاره؛ یو شمېر امارتي او خصوصي تحصیلي بنسټونو ته د ۷ نړیوالو علمي څېړنیزو او ۲۶ ملي علمي څیړنیزو ژورنالونو د خپرولو اجازه ورکړل شوه.
په همدې موخه غونډه چې د لوړو زده کړو وزارت مسؤلینو، د هېواد د یو شمېر امارتي او خصوصي پوهنتونونو د رئیسانو او علمي مرستیالانو په ګډون جوړه شوې وه، ویناوالو پکې د هېواد پوهنتونونو د کیفیت لوړولو لپاره د علمي څېړنیزو ژورنالونو پر ارزښت خبرې وکړې.
په پیل کې د لوړو زده کړو وزارت علمي معین دوکتور لطف الله خیرخواه هغو پوهنتونونو ته چې د نړیوالو او ملي علمي څیړنیزو ژورنالونو د خپرولو جواز یې ترلاسه کړی دی مبارکي وویله او ویې ویل چې دا اقدام د هېواد په پرمختګ کې یو اغېزمن ګام، د پوهنتونونو کیفیت او په یادو بنسټونو کې د علمي او څیړنیزو فعالیتونو وده ده.
نوموړي په اسلامي هېوادونو په تېره بيا افغانستان کې د علمي څېړنو ټيټې کچې ته په اشارې سره د هېواد د پوهنتونونو له مسؤلينو او استادانو وغوښتل چې د علمي مقالو د چمتو کولو او خپرولو په برخه کې له شته امکاناتو او فرصتونو څخه اعظمي ګټه پورته کړي.
د لوړو زده کړو وزارت علمي معین دغه راز وویل، چې د هېواد اوسني نظام له اقتصادي ستونزو سره سره د هېواد تحصیلي برخې ته ځانګړې پاملرنه کړې او د مالي او فزیکي اسانتیاوو په برابرولو کې د هېواد د استادانو ترڅنګ ولاړ دی.
وروسته د لوړو زده کړو وزارت د څېړنې، تالیف او ژباړې رئیس دوکتور حمید الله مزمل د یاد ریاست د یو کلنو لاسته راړونو په اړه معلومات وړاندې کړل او ويې ویل، چې دا ریاست د لوړو زده کړو وزارت یو له مهمو ریاستونو څخه دی، چې په مختلفو برخو کې په ځانګړې توګه استادانو لپاره د څیړنې پروژې او د بودیجې، د علمي څېړنو آمریت بستونو معاونیت ته لوړول، په تحصیلي بنسټونو کې د څیړنیزو مرکزونو د تجهیزاتو برابرولو د منظورۍ ترلاسه کول، الیکترونکي کتابتون، د نوي ډيټابیس له مخې چارې ترسره کول، د پوهنتونونو فزیکي کتابتونونو جوړولو او پیاوړتیا لپاره د پلان چمتو کول، د ملي او نړیوالو کنفرانسونو جوړولو لپاره د چمتووالی او نورو برخو فعالیتونه ترسره کړي او ورته نور پلانونه په پام کې لري.
همدارنګه په دغه ناسته کې د کابل پوهنتون علمي مرستیال پوهاند محمد شفیع شریفی، د کاردان خصوصي پوهنتون رئیس دوکتور خالد حاتم او د ننګرهار پوهنتون علمي مرستیال پوهندوی احسان الله ناصح د موضوع اړوند خبرې وکړې او په پای کې د اړوندو امارتي او خصوصي پوهنتونونو مسؤلینو ته د ملي او نړیوالو ژورنالونو د خپرولو اجازه ورکړل شوه.
