د کابل طبي علومو ( ابو علي سینا) پوهنتون په چوکاټ کې د طبي انجینرۍ ډیپارټمنټ (Biomedical Engineering) او د یاد ډیپارټمنټ لخوا له وخت مخکې زېږېدلو ماشومانو د ساتنې ماشین (انکوباتور) د لوړو زده کړو وزارت د علمي معین دکتور لطف الله خیرخواه لخوا پرانیستل شو.
په کابل طبي علومو پوهنتون کې د طبي ډیپارټمنټ او انکوباتور ماشین پرانیستې لپاره غونډه جوړه شوې وه، چې د کابل طبي علومو پوهنتون رهبرۍ سربېره د لوړو زده کړو وزارت علمي معین هم پکې ګډون کړی و. علمي معین د یاد ډیپارټمنټ پرانیستل پرمختګ وباله او ویې ویل چې راځئ یو بل ته لاس ورکړو او مخته لاړ شو ترڅو له دنیا والو سره سیالي وکړو او په دې علمي برخه کې نظام ستاسو پوره ملاتړ کوي.
نوموړي زیاته کړه چې د وزارت لخوا په ټولو تحصیلي بنسټونو کې څېړنیز معاونیتونه رامنځته شول، الحمدالله وروسته له دې به محصلین په تحصیلي بنسټونو کې د نورو چارو ترڅنګ څېړنیزې پروژې هم پرمخ وړي.
ورپسې د کابل طبي علومو پوهنتون رئیس پوهنیار دوکتور فضل الرحمن رحماني د طبي انجینرۍ پر ارزښت وغږید او وویل چې د افغانستان طبي ټولنه د ورته ډیپارټمنټونو رامنځته کولو ته اړتیا لري او ډېر د خوشحالۍ ځای دی چې وروسته له دې به د طبي انجینرۍ لیسانس محصلین ټولنې ته وړاندې کړو او دا لاسته راوړنه دې ټولو ته مبارک وي.
همدارنګه د کابل طبي علومو پوهنتون علمي معاون پوهاند نجیب الله امرخیل د متخصصو کسانو پر روزلو ټینګار وکړ او وویل چې د ماشینرۍ ترڅنګ باید متخصص کسان ولرو چې د نوموړو ماشینونو په ترمیم، ډیزاین او نصب پوه وي.
وروسته د یاد ډیپارټمنټ امر انجینر فیصل د ډیپارټمنټ رامنځته کولو پر موخو، امکاناتو، لاسته راوړنو، ستونزو او حل لارو پرزینټیشن ورکړ.
په پای کې د لوړو زده کړو وزارت علمي معین یاد ډیپارټمنټ او انکوباتور ماشین د پټۍ په پریکولو پرانیست او همدارنګه يې له هغو ماشینونو څخه لیدنه وکړه چې په دغه څانګه کې ورڅخه ګټه اخیستل کیږي.
نېټه: سه شنبه ۱/۱۲/۱۴۴۴ هـ ق ۳۰/۳/۱۴۰۲ هـ ش ۲۰/۶/۲۰۲۳ م
