د کابل پولي تخنیک پوهنتون کې د افغانستان د اوبو مطالعه او مدیریت علمي ـ څېړنیز کنفرانس جوړ شو
د کابل پولي تخنیک پوهنتون کې د کمال خان بند پرانیستنې په پار د افغانستان د اوبو مطالعه او مدیریت علمي ـ څېړنیز کنفرانس جوړ شو.
د دغه کنفرانس په پیل کې د لوړو زده کړو وزیر دوکتور عباس بصیر چې د کنفرانس له کډوالو سره په انلاین توګه وصل وو، د کابل پولي تخنیک پوهنتون له لوري د افغانستان د اوبو مطالعه او مدیریت علمي ـ څېړنیز کنفرانس د جوړېدو له کبله مننه وکړه او ویې ویل چې د کمال خان بند بشپړېدو او پرانیستو ټولو ته د دې فرصت ورکړ چې د افغانستان اوبو ته له علمي او اکاډمیک اړخه وګوري. دغه راز د افغانستان اوبو او د اوبو سرچینو ارزښت له علمي او څېړنیز اړخه وڅېړي.
د لوړو زده کړو وزیر وویل:"سره له دې چې د ابي منابعو زیاتې زېرمې لرو، خو له اوبو د ناسمي ګټې اخیستنې او د هوا له بدلون سره له داسې ستونزو سره مخ یو چې د اوبو د کمښت اندېښنې یې رامنځته کړي دي." هغه وویل، په افغانستان کې یخچالونه د کوچني کېدو په حال کې دي او چینې ورځ په ورځ کمېږي او له منځه ځي. نو د دې اړتیا ده چې د ساینس له تجربو یې زده کړه وشي چې څه ډول خپلې اوبه مدیریت کړو او له دغو ستونزو د وتو لپاره علمي لارې چارې ولټووو. دوکتور عباس بصیر وویل، چې د کمال خان بند پرانیستنه زموږ ټولو لپاره د راویښېدو یوه ښه بېلګه ده، چې په دې برخه کې هڅې وشي او د پوهنتونونو په کچه د داسې کنفرانسونو په جوړولو سره ظرفیتونه په کار واچول شي.
د لوړو زده کړو وزیر په تحصیلي بنسټونو کې د ورته فرصت رامنځته کولو له کبله له ولسمشرۍ مقام څخه مننه وکړه او همدارنګه د پوهنتونونو له لوري د ورته علمي کنفرانسونو جوړول یې وستایل او ویې ویل، چې د لوړو زده کړو وزارت په داسې برنامو کار کوي چې د زده کړې محوره نظام په څېړنیز محوره تحصیلي نظام واړوي او د پوهنتونونو دویم نسل سره چې څېړنه پکې اساسي رول لري همغږې شي.
دوکتور عباس بصیر وویل؛ زموږ بله موخه دا ده چې د هېواد تحصیلي نظام د پوهنتونو درېیم نسل سره چې تولیدي رول به ولري او د علم او ټکنالوژۍ په مټ به اسانتیاوې رامنځته کړي، برابر کړو.
د لوړو زده کړو وزیر د کابل پوهنتون په نوښت څو ورځې وړاندې جوړ شوي کنفرانس ته په اشارې د دغه کنفرانس جوړوونکو ته بریا وغوښته. همدارنګه ویې ویل چې هیلمن دی چې د کابل پولي تخنیک پوهنتون له لوري د علمي ـ څېړنیز کنفرانس وځلیږي او د هېواد د اوبو سرچینو په علمي مدیریت کې اړین رول ولوبوي.
په پام کې ده چې په دغه علمي ـ څېړنیز کنفرانس کې لاندې څېړنیزې مقالې:
۱ـ چشم انداز تکامل حکمرانی آب در افغانستان از درک تحول دیدگاه" د افغانستان د اوبو او چاپېریال ساتنې د څېړنې ملي مرکز مشر دوکتور محمد وسیم اقبال اثر.
۲ـ «ارزش اقتصادی بند کمال خان» د کابل پولي تخنیک پوهنتون د ماسټرۍ پروګرامونو استاد، پوهاند دوکتور محمد قاسم صدیقي اثر.
۳ـ «مقایسه استفاده آب افغانستان و ایران د رحوزه هلمند» په جرمني کې د دوکتورا محصل محمد عاصم مایار اثر.
۴ـ «بند کمال خان فرصتی برای همکاری های منطقوی» د افغانستان چاپېریال ساتنې او اوبو لګونې څېړنیز ملي مرکز هایدرولوژي کمیټې څخه عبیر احمد او مریم سجود اثر.
۵ـ «مرور بر نتایج اعمار بند کمال خان» د ماسټري لومړۍ دورې محصل نجیب شیرزاد اثر. دغه راز د اوبو منابعو هر اړخیزه مدیریت وړاندې شو او په دې اړه خبرې وشوې او نظریات وړاندې شول.
د افغانستان د چاپېریال ساتنې او اوبو څېړنې ملي مرکز مشر دوکتور وسیم اقبال په خبره؛ تر اوسه په نړیواله کچه د اوبو په اړه ۵۰۰ زره علمي ـ څېړنیز د باور وړ سندونه شته چې یوازې ۳۷ سندونه یې د افغانستان په څېړونکو پورې اړوند دي. هغه وویل، ورته علمي کنفرانسونه به په دې برخه کې نورو څېړنو ته لار هواره کړي.
