د کرونا پر وړاندې واکسین دوه ورځنی کمپاین رسما په کابل پوهنتون کې پیل شو
د دغه کمپاین د پرانستې په مراسمو کې په داسې حال کې چې د کابل پوهنتون رهبري پلاوي ، استادانو ، کارکونکو او د یاد پوهنتون زده کړیالانو شتون درلود، د کابل پوهنتون مشر پوهاند ډاکتر محمد عثمان بابری د واکسین د اغیزمنتوب ( موثریت) او ګټو په اړه معلومات ورکړل او له ټولو استادانو، زده کړیالانو او کارکونکو یې وغوښتل چې له د فرصت څخه ګټه پورته کړي ترڅو د کرونا ویروس په وړاندې خپل ځان خوندي کړي. هغه زیاته کړه چې واکسین په داوطلبانه ډول دی او د کابل پوهنتون ټول اوسني او متقاعد استادان، زده کړیالان او کارکونکی پکې شامل دي.
د کابل پوهنتون د زده کړیالانو چارو مرستیال پوهاند فصیل امین په کابل پوهنتون کې د کرونا واکسین پلي کولو لپاره د لوړو زده کړو او عامې روغتیا د وزارتونو له مشرتابه څخه مننه وکړه او وویل چې په دې دوه ورځینې کمپاین کې د عامې روغتیا وزارت ۳۰ واکسیناتوران په اتو حوزو کې تنظیم شوي چې استادان ، زده کړیالان او کارکونکي کولی شي یادو حوزو ته په داوطلبانه ډول ورشي. د هغه په وینا ، اوس مهال کابل پوهنتون ۹۰۰ استادان ، ، ۲۶ زره زده کړیالان او ۷۰۰ کارکونکي لري.
د یادونې وړ ده چې د کرونا واکسین د پلي کولو کمپاین د لوړو زده کړو وزارت په مرکز او د هیواد په یو شمیر نورو تحصیلي بڼسټونو کې پلي شوی چې د دې وزارت د مشرتابه ، مرستیالانو ، رئیسانو او کار کونکو په ګډون یې ترې ګټه پورته کړې ده.
