د کندز پوهنتون (د افغانستان په ځان بسیاینه کې د پوهنتونونو ونډه) تر نامه لاندې دوه ورځني ملي کنفرانس کې د لوړو زده کړو وزارت علمي معین محترم دوکتور لطف الله خیرخواه د وینا مهم ټکي:
۱ـ پوهنتونونه په ټولنه کې ستر مسؤلیت لري، تر څو ټولنې ته متخصصین وړاندې کړي او په اسلامي ټولنه کې د علم بېلګې شي، چې د هېواد راتلونکی نسل پرې وویاړي.
۲ـ د افغانستان د لوړو زده کړو په تاریخ کې په دې مهمه موضوع تر اوسه کار نه و شوی، هیله او هوډ لرو چې په دې موضوع نور کنفرانسونه هم جوړ شي.
۳ـ د پوهنتونونو ایجاد او پر مختګ ته پاملرنه، د اسلامي نړۍ عالمانو فکر او نظریه ده.
۴ـ استادان باید دې ټکي ته پام وکړي، چې موږ د دوی فکر ته احترام لرو او هغه فرضیې چې دوی یې په دغسې کنفرانسونو کې ټاکي، ټولنه د همدې فرضیو په رڼا کې خپله لار لټوي.
۵ـ دغه کنفرانس به په شکلي لحاظ ډېر کوچنی ښکاري، خو په معنوي لحاظ ستر ارزښت لري، په دې کنفرانس کې پر هغو موضوعاتو او لارو بحث کېږي چې د څلوېښت میلیونه افغانانو په ځان بسیاینه کې رول لري.
۶ـ پوهه او څېړنه په هر ځای او هره برخه کې خپلې ځانګړې اغېزې لري، په دې کنفرانس کې چې کومې څېړنې وړاندې کېږي، د هېواد په ځان بسیاینه کې به مثبتې اغېزې ولرې.
۷ـ په هېواد کې د تحصیلي بنسټونو پر متختګ او پراختیا د لوړو زده کړو وزارت له عمده موخو څخه ده.
