د کندهار پوهنتون شرعیاتو پوهنځی او ابراهیم النخعي ؒ جامعې ریاست ترمنځ د دوه اړخیزو همکاریو هوکړه لاسلیک شو
په همدې مناسبت جوړه شوې غونډه کې د کندهار پوهنتون رئیس مولوي اکرم شاه عاصم ګډونوالو ته ښه راغلاست ووایه او د دوه اړخیزو همکاریو پر ارزښت یې خبرې وکړې، هغه دغه راز د دواړو اړخونو پر دوامداره همکارۍ ټینګار وکړ.
وروسته د ابراهیم النخعي ؒ جامعې ریاست رئیس قاضي عبدالصادق غزنوي د کندهار پوهنتون سره د ګډو همکاریو پر هوکړه لیک خوښي وښوده او زیاته یې کړه چې کندهار پوهنتون د علمي کادرونو د روزنې اوږده مخینه لري چې د هیواد په زرګونو تنه ځوانان یې د لیسانس تر کچې په معیاري او مسلکي توګه روزلي دي.
د یادونې وړ ده چې د یاد هوکړه لیک په مرسته به دواړه نهادونه د څېړنې، نصاب بیاکتنې، تضمین کیفیت، علمي کنفرانسونو او ځینو نورو برخو کې له یو بل سره خپلي تجربې شریکوي او له شته فرصتونو او امکاناتو به ګټه اخلي.
