لوړو زده کړو وزارت مالي او اداري معین له یو شمېر استادانو سره وکتل
لوړو زده کړو وزارت مالي او اداري معین له یو شمېر هغو استادانو سره چې مالیزیا هېواد ته د ماسټـرۍ له پاره تللي وو وکتل.
په دې کتنه کې استادانو د لوړو زده کړو وزارت له غوره اسانتیاوو څخه په مننې، په مالیزیا کې د هغوی له پاره د مناسبو امکاناتو د موجودیت او د هغوی د تحصیلي دورې راپور ورکړ او په هغه هېواد کې يې د لا زیاتو زده کړو او زیاتو تجربو د لاسته راوړو په موخه خپلې غوښتنې مطرح کړې.
مالي او اداري معین نور احمد دروېش په داسې حال کې چې د یادو استادانو د زحمتونو او له فرصت څخه د هغوی د غوره ګټه اخستنې په پار ستاینه وکړه؛ ژمنه يې وکړه چې د هغوی له پاره به د لا زیاتو تحصیلي فرصتونو د زمینې برابرولو په برخه کې هېڅ راز هڅې ونه سپموي.
مالي او اداري معین وویل، په فوق لیسانس پروګرامونو کې د استادانو ګډون زموږ اړتیا ده او د غوره تحصیل اسانتیا برابروي او له شک پرته د افغانستان د تحصیلاتو د کیفیت په لوړتیا به مثبت اغېز کوي.
د یادونې وړ ده چې د کرنې او وترنرۍ ۲۰ تنه استادان په ۲۰۱۸م کال مالیزیا ته د لوړو زده کړو وزارت د پراختیا پروګرام له خوا د ماسټرۍ په موخه لېږل شوي وو چې په نږدې وخت کې به د هېواد د خدمت له پاره بېرته راشي.
