مالي او اداري معین د کابل ښوونې او روزنې پوهنتون، پیل شویو پروژو څخه لیدنه وکړه
په کابل ښوونې او روزنې پوهنتون کې د داخلي سړکونو جوړولو، د فامیلیانو او پوهنتون ترمنځ د دیوال جوړولو او د تجربوي بلاکونو د ترمیم بېلابېلو پروژو چارې روانې دي، چې د لوړو زده کړو وزارت مالي او اداري معین مولوي حافظ محمد حامد حسیب ترې له نږدې لیدنه وکړه.
د یادو پروژو څخه د لیدنې پرمهال محترم مالي او اداري معین د پوهنتون له رهبرۍ مننه وکړه، چې د هېواد بچیانو لپاره خدمت کوي. هغه دغه راز زیاته کړه، چې د هېواد آبادول زموږ او ستاسو مسؤلیت دی او باید کوښښ وکړو چې په ګده سره هېواد آباد او په هره برخه کې چې مسؤلیت راته سپارل شوی، په سمه توګه یې مخته یوسو.
په ورته وخت کې د کابل ښوونې او روزنې پوهنتون رئیس شیخ الحدیث مولوي سید بشیر آغا هاشمي د لوړو زده کړو وزارت مالي او اداري معین او ورغلي پلاوي ته د ښه راغلاست ویلو ترڅنګ د یادو پروژو په اړه معلومات ورکړل.
نېټه: چهارشنبه
۱۴۴۶هـ.ق د جمادي الاخرة ۱۶مه
۱۴۰۳هـ.ش د لیندۍ ۲۸ مه
۲۰۲۴ م د ډسمبر ۱۸ مه
