ننګرهار پوهنتون کې د HEMIS سیستم د پوهاوي یو ورځنی ورکشاپ جوړ شو
دغه ورکشاپ کې چې د ننګرهار پوهنتون د اړوندو پوهنځیو تدریسي او اجرائیه مدیرانو ته جوړ شوی ؤ، د یاد سیستم د کارولو په اړه پوهاوی ورکړل شو.
د محصلانو چارو مرستیال پوهنوال سید اکرم هاشمي د خپلې وینا پر مهال د پوهنځیو تدریسي او اجرائیه مدیرانو ته سپارښتنه وکړه، چې د لوړو زده کړو محترم وزارت د هدایت او د پوهنتون ادارې له پرېکړې سره سم د محصلینو، استادانو او کریکولم اړوند ټول مواد باید په سافټ بڼه د HEMIS په آنلاین سیستم کې ځای پر ځای کړي.
نوموړي د کمپیوټر ساینس پوهنځي له ادارې او استادانو مننه وکړه، چې په دې برخه کې له استادانو او اداري کارکوونکو سره مرسته کوي.
ورپسې د کمپیوټر ساینس پوهنځي استادانو پوهنمل محمد اسماعیل خطاب او پوهنیار محمد فهیم عزیزي لهخوا HEMIS سیستم د مېکانېزم او کارونې په اړه د ورکشاپ ګډونوالو ته پریزنټېشنونه ورکړل شول او د هغوی پوښتنې یې ځواب کړې.
