نن د کابل پوهنتون نوی رییس د یوې ناستې په ترڅ کې د دغه پوهنتون استادانو او کار کوونکو ته وروپېژندل شو

۱۴۰۰کال، د لړم ۵مه. 
د کابل پوهنتون نوي رییس دوکتور اسامه عزیز د معرفي کولو په مراسمو کې، د علمي او زده کړیالانو چارو سرپرست معینانو او د لوړو زده کړو وزارت د سرپرست دفتر رییس حضور درلود. 
په یاده ناسته کې د لوړو زده کړو وزارت د علمي چارو سرپرست معین دوکتور لطف الله خیرخواه، د کابل پوهنتون د رییس په توګه د دوکتور اسامه عزیز ګومارنه، د کابل پوهنتون د علمي موقف د ځواکمن کېدو په برخه کې ګټور وباله او د دې تمه یې وښوده، چې کابل پوهنتون به په علمي ډګر کې تر بل هر وخت ښه وځلیږي. د لوړو زده کړو وزارت علمي معین زیاته کړه، چې لوړو زده کړو وزارت په دې هڅه کې دی، چې وړ او وطن دوست کسان د هېواد په پوهنتونونو کې جذب کړي. لطف الله خیرخواه د کابل پوهنتون مخکیني سرپرست محمد اشرف غیرت له کړنو مننه وکړه او هیله یې وښوده، چې د دغه اکاډمیک بنسټ نوی رییس به د دغه پوهنتون د استادانو په همکارۍ سره د تدریس په ښه‌والي او د نوې تدریسي بڼې په برخه کې جدي هڅې وکړي.  
وروسته د کابل پوهنتون مخکیني سرپرست محمد اشرف غیرت، د دغه پوهنتون د استادانو له همکاریو او په هېواد کې د پوهې د پرمختګ لپاره د هغوی له هڅو مننه وکړه او د کابل پوهنتون نوي رییس لپاره یې د الله تعالی له دربار څخه توفیق وغوښت. 
د کابل پوهنتون نوي رییس دوکتور اسامه عزیز وویل، چې هڅه کوي دغه لوی علمي بنسټ د اسلام مبین دین او هېواد ځورېدلو خلکو د خدمت په موخه، په ښه ډول مدیریت کړي. 
دوکتور اسامه عزیز له اسلام اباد نړیوال پوهنتون څخه د دوکتورا سند تر لاسه کړی دی.