وردګ د لوړو زده کړو موسسه کې د (( OBE-SCL )) لس ورځنی ورکشاپ پیل شو
د یاد ورکشاپ د پرانیستنې په موخه د پوهنتون رییس پوهنیار مسعود حسن زي، د علمي او محصلانو چارو مرستیال پوهنمل سید انور اکبري، د پوهنځیو رییسانو، د څانګو آمرینو، استادانو او د لوړو زده کړو وزارت څخه راغلو استادانو چې د دغه ورکشاپ د ټرېنرانو په توګه وردګ د لوړو زده کړو موسسې ته ورپېژندل شوي وو، ګډون درلود .
د پوهنتون رئیس پوهنیار مسعود حسن زي د پایلو پر بنسټ پوهې او د محصل محوري زده کړو (OBE-SCL) په اړتیا او ارزښت وینا وکړه او د یاد ورکشاپ اهمیت ته په اشارې سره یې له ټولو استادانو څخه وغوښتل چې په پوره اخلاص او لېوالتیا سره په یاد ورکشاپ کې برخه واخلي او له لاسته راوړنو او تجربو څخه یې په راتلونکي کې اغېزناکه ګټه پورته کړي . همدا راز یې له وزارت څخه راغلو ټرېنر استادانو څخه د ورکشاپ د ګډونوالو پوښتنو ته د ځواب ویلو په برخه کې د پوره حوصلې غوښتنه وکړه.
د دغه پرانیستې مراسمو په وروستۍ برخه کې د لوړو زده کړو څخه ورپېژندل شوي ټرېنر استاد رحماني وینا وکړه او د ورکشاپ پر اهمیت یې رڼا واچوله او هیله یې څرګنده کړه چې په دغه ورکشاپ د برخه اخیستونکو استادانو د ظرفیت لوړونې په برخه کې به یاد ورکشاپ مهم رول ولوبوي. همدا راز نوموړي د پوهنتون مشرتابه ته ډاډ ورکړ چې په یاد ورکشاپ کې له ګډون کوونکو سره په پوره هڅې او حوصلې سره کار وکړي.
په دې لس ورځني ورکشاپ کې به د نورو مهمو موضوعاتو تر څنګ په لاندې برخو هراړخیز بحث وشي او معلومات ورکړل شي.
1. پر پایلو ولاړې زده کړې.
2. شاګرد محوره زده کړې.
3. د اغېزناک تحصیلي نصاب پراختیا او د هغه مهارتونه او لارې چارې.
4. د تحصیلي موخو ټاکل او د هغه مراحل او لارې چارې.
5. د ټاکل شویو موخو پر بنسټ د زدکړیالانو ارزونه او د ارزونې بېلابېل میتودونه.
6. د ټاکل شویو موخو، درسي توکو او د ارزونې د پایلو پرتله.
7. د مشارکتي زده کړو څخه په ګټه اخیستنې د ډلګۍ پر بنسټ د زدکړو پراختیا او ملاتړ.
8. له پورته ښکته، له ښکته پورته او مختلطې زده کړې.
9. غیر حضوري یا آنلاین زده کړې.
