په بدخشان پوهنتون کې د «افغانستان د سیاحتي جاذبو ملي کنفرانس» د ا.ا.ا د کابینې غړو په ګډون پیل شو.
دغه درې ورځني ملي کنفرانس ته د بهرنیو او کورنیو تحصیلي بنسټونو څخه ۱۰۸ علمي-څېړنیزې مقالې لېږل شوي، چې له ډلې به یې لومړۍ درجه ۴۰ مقالې په کنفرانس کې وړاندې شي.
د کنفرانس په پیل کې د رئیس الوزراء اداري مرستیال مولوي عبدالسلام حنفي خپلو خبرو کې د یاد کنفرانس له جوړیدو څخه خوښي څرګنده کړه ویې ویل: «د ویاړ ځای دی چې علمي کادرونه د افغانستان ښکلاوې افغان ملت او نړۍ ته ښکاره کوي او د افغانستان د سیاحتي ځایونو په اړه پوهاوی ورکوي».
همداراز د لوړو زده کړو سرپرست وزیر شیخ الحدیث مولوي نداء محمد ندیم یاد کنفرانس او مقالې د سیلانیانو را جلبولو په برخه کې مهمې وبللې او زیاته یې کړه: « دغه کنفرانس او مقالې چې د سیلانیانو راجلبولو په اړه ليکل شوي دي، زموږ د ځوانانو تر څنګ به د بهرنیو سيلانيانو لپاره هم ښې پایلې ولري.»
ورپسې د اقتصاد سرپرست وزیر قاري دین محمد حنیف په افغانستان کې سیاحتي صنعت ته ودې ورکولو، نړیوال ورته راجلبولو او د افغانستان د تمدن او کلتور په اړه خبرې وکړې.
همدارنګه د لوړو زده کړو وزارت علمي معین دوکتور لطف الله خیرخواه هم د کنفرانس ارزښت بیان کړ او ویې ویل، چې د افغانستان سیاحتي جاذبې د افغانستان د کانونو په څېر خامې پاتې دي؛ اړتیا ده چې د دغو جاذبو کشفولو او څېړلو ته کار وشي.
ورپسې د بدخشان پوهنتون رئیس مولوي نظر محمد نیازي د کنفرانس پر اړتیا او ارزښت خبرې وکړې او ویې ویل، چې د دغه کنفرانس د جوړیدو اړتیا محسوسېدله، ځکه چې افغانستان د پراخو سیاحتي جاذبو لرونکی هېواد دی او د نړیوالو د توجه جلبول پکار وو.
د یادونې وړ ده، چې دغه کنفرانس ته راغلې ۱۰۸ مقالې به له توحید او ترتیب وروسته هغو سکتوري وزارتونو ته سپارل کیږي، چې د سیاحت په برخه کې کار کوي، ترڅو په خپلو پالیسیو او طرحو کې ورڅخه ګټه واخلي او لیکوالو استادانو ته به د مالي امتیازاتو د ورکړې ترڅنګ، په ترفیع کې حساب شي.
