په پام کې ده چې په دولتي پوهنتونونو کې د پښتو ژبې او ادبیاتو د ماسټرۍ ګډ پروګرام جوړ شي
د لوړو زده کړو وزارت یو پروګرام پیلوي چې په پام کې ده پر بنسټ یې د هېواد دولتي پوهنتونونه په ګډه همکارۍ له خپلو مادي، تخنیکي او انساني اسانتیاوو څخه په ګټې په اړتیا وړ څانګو کې د ماسټرۍ ګډ پروګرامونه رامنځته کړي او غوښتونکو ته د لا زیاتو زده کړو لار هواره کړي.
په همدې موخه د علمي پروګرامونو، پلان او پالیسۍ او مالي او حسابي رییسانو او همدارنګه د اوو پوهنتونونو علمي مرستیالانو نن په یوه ناسته کې د پښتو ژبې او ادبیاتو د ماسټرۍ ګډ پروګرام د هوکړه لیک پر مادو او په اکاډمیکو، مالي او تخنیکي اړخونو کې یې د تطبیق لپاره پر لا ښو حل لارو باندې په غور سره کار وکړ او په پای یې هغه نهایي کړ.
د لوړو زده کړو وزارت علمي معین پوهنمل عبدالتواب بالاکرزي په دې ناسته کې وویل چې د لوړو زده کړو بنسټونو کې د ماسټرۍ ګډو پروګرامونو رامنځته کول نه یوازې په پوهنتونونو کې له شته ظرفیتونو څخه اغېزناکې ګټې اخیستنې ته لار هواروي، بلکې په حضوري توګه او له انلاین سیستم څخه په ګټې د تحصیلي بنسټونو تر منځ د همغږۍ او نږدېتوب لامل کېږي او له بلې خوا د ځوان نسل د تحصیلي وړتیا لوړولو لپاره د دوی اړتیاوې هم پوره کوي.
د یادونې وړ ده چې په تحصیلي بنسټونو کې د ماسټرۍ ګډو پروګرامونو رامنځته کولو ګام په داسې حال کې پورته کېږي چې اوسمهال په هېواد کې د ماسټرۍ دورې لپاره غوښتنه مخ په زیاتېدو ده او د هېواد زرګونه ځوانان په هېواد کې د اسانتیاوو نشتوالي له کبله اړ کېږي چې په ټیټ کیفیت خو په لوړ لګښت د ماسټرۍ په کچه زده کړو لپاره له هېواد څخه بهر په تېره بیا ګاونډیو هېوادونو ته ولاړ شي.
که څه هم ټول پوهنتونونه او د لوړو زده کړو بنسټونه د ماسټرۍ پروګرامونو د شرایطو نه بشپړولو له کبله تر اوسه په خپلواکه توګه د دغو پروګرامونو د رامنځته کولو توان نه درلود، خو ګډه همکاري او یو د بل له اسانتیاوو څخه ګټه اخیستنه د دغو ننګونو د له منځه وړلو لامل کېږي او په راتلونکي کې په دې برخه کې د پوهنتونونو وړتیا هم لوړوي.
له بلې خوا د لوړو زده کړو وزارت د یوه اوږدمهالي پروګرام پر بنسټ په پام کې لري چې هر کال ۱۰۰ استادان د دوکتورا په کچه زده کړو لپاره له هېواد څخه بهر واستوي. ترڅو په تحصیلي بنسټونو کې د اړتیا وړ ماسټرۍ پروګرامونو رامنځته کولو لپاره لا زیاته لار هواره شي.
