په کابل پولي تخنیک پوهنتون کې د ماسترۍ برنامو آتمې دورې فارغانو د وروستۍ پروژې/ تیزېس د دفاع لړۍ پیل شوه
۱۴۰۰کال، د کب ۲۸مه
په کابل پولي تخنیک پوهنتون کې د ماسترۍ برنامو آتمې دورې فارغانو د وروستۍ پروژې/ تیزېس د دفاع لړۍ پیل شوه.
په دغو مراسمو کې د لوړو زده کړو وزارت د خصوصي محصلانو چارو رئیس انجنیر سید اسماعیل روحاني، د دولتي محصلانو چارو رئیس استاد حامد یعقوبي، د کابل پولي تخنیک پوهنتون رئیس پوهنوال عبدالرشید اقبال او ګڼ شمېر استادانو او محصلینو ګډون کړی وو.
د لوړو زده کړو وزارت د خصوصي محصلانو چارو رئیس نوموړې غونډې ته د خبرو پر مهال وویل، چې د لوړو زده کړو وزارت نوې رهبري د فوق لیسانس پروګرامونو پراختیا ته ځانګړې پاملرنه کوي، چې په دغه برخه کې د پام وړ لاسته راوړنې لري او هڅه کوي چې په یاده برخه کې لا ډېر مسلکي کادرونو ته د تحصیل زمینه برابره کړي.
نوموړي زیاته کړه، چې د ټولو دولتي فوق لیسانس پروګرامونو په فیسونو کې د پام وړ کمښت راغلی او د محصلینو لپاره ټولې لازمې او ضروري اسانتیاوې په پام کې لري.
همدارنګه هغه په خپلو څرګندونو کې وویل، چې د لوړو زده کړو وزارت رهبري د فوق لیسانس پروګرامونو په برخه کې خصوصي سکټور ته هم اسانتیاوې برابرې کړي، چې پر روڼتیا یې ټینګار کوي او په دغه برخه کې هم ډېر کار شوی دی.
د یادونې وړ ده، چې د یاد ماستري پروګرام له آتمه دورې څخه به تقریباً ۹۰ تنه محصلین فارغیږي، چې د تېزیسونو دفاع به یې تر راتلونکو څو روځو پورې په نورمال ډول دوام وکړي.
