د لوړو زده کړو وزیر پروان ولایت ته د خپل رسمي سفر په ترڅ کې د پروان پوهنتون له مشرتابه او محصلینو سره وکتل.
د لوړو زده کړو وزیر شیخ الحدیث مولوي نداء محمد ندیم د پروان پوهنتون مسؤلینو له لوري د دغه پوهنتون په اړه د روانو چارو، پرمختګونو، لاسته راوړنو، ستونزو او اړتیاوو راپور واورېد. نوموړي د یاد پوهنتون د مسؤلینو لاسته راوړنې وستایلې، د ستونزو د حل ډاډ یې ورکړ او د چارو غوره والي په برخه کې یې لازمې لارښوونې ورته وکړې. دغه راز سپارښتنه یې ورته وکړه چې له لیلیې څخه د پاتې محصلینو ستونزو ته رسیدنه وکړي.
همدارنګه د لوړو زده کړو وزیر د پروان پوهنتون له محصلینو سره د هغوی په ټولګیو کې وکتل او د هغوی ستونزې او وړاندیزونه یې واورېدل.
د یادونې وړ ده چې د لوړو زده کړو وزیر د هېواد شمالي ولایتونو ته په خپل رسمي سفر کې د بلخ، کندوز، تخار او بدخشان پوهنتونونو څخه هم لیدنه وکړه.
