د کابل عبدالله بن مسعود رضي الله عنه جامعې له افتاء او قضاء څانګې څخه ۷۱ فاضلان فارغ او ټولنې ته د خدمت لپاره وړاندې شول
په همدې مناسبت فراغتغونډه کې د لوړو زده کړو سرپرست وزیر یادو فاضلانو ته د مبارکۍ تر څنګ وویل چې تاسو به د خپل مسلک اړوند قضاء، افتاء او نورو علمي برخو کې کار کوئ او زیاته یې کړه: «په اداري بستونو پسې به نه ګرځئ، په داسې یوه علمي ځای کې به خدمت کوئ، چې خیر مو اسلام، اسلامي نظام او مسلمانانو ته ورسیږي».
دغه راز نوموړي یاد فاضلان لا نورو لوړو زده کړو ته وهڅول او ورته ویې ویل چې تاسو اوس د تخصص مسیر ته برابر شوئ، همېشه به خپله مطالعه جاري ساتئ او په دې زده کړو به بسنه نه کوئ.
شیخ صاحب وویل چې اسلامي نظام د افتاء او قضاء په برخه کې دا ډول متخصصو مفتیانو او قاضیانو ته ډېره اړتیا لري او د قضاء برخه، چې د یو هېواد تر ټولو مهمه برخه ده، مسلکي خواته بېولی شي.
دغه راز د ارشاد، حج او اوقافو وزارت مسلکي معین شیخ الحدیث مولوي زر محمد حقاني مسلکي مفتیان او قاضیان د هېواد پانګه وبلله او زیاته یې کړه چې دوی به په محاکمو کې ګمارل کېږي او عدالت به قایموي.
نوموړي د اخلاقي او اداري فساد او همدارنګه د طاغوت له منځه وړلو کې د ا.ا.ا لاسته راوړنو ته په اشارې سره وویل چې مسلمانان به همېشه د اسلام حاکمولو لپاره او کفار د کفر لپاره کار کوي.
همدارنګه په دغه فراغتغونډه کې جیدو علماء کرامو او استادانو فارغ شویو فاضلانو ته لازمې لارښوونې او سپارښتنې وکړې او له هغوی یې وغوښتل چې خپل هېواد او خلکو ته په اخلاص خدمت وکړي.
د یادونې وړ ده چې د غونډې په پای کې فارغو فاضلانو ته د فضیلت دستارونه ورپرسر شول.
نېټه: یکشنبه
۱۴۴۶ هـ.ق د رجب المرجب ۱۸مه
۱۴۰۳ هـ.ش د جدي ۳۰مه
۲۰۲۵ م د جنوري ۱۹مه
