د لوړو زده کړو وزارت رهبري شورا ناسته د دغه وزارت سرپرست وزیر محترم شیخ الحدیث مولوي نداء محمد ندیم په مشرۍ ترسره شو
د ناستې په پیل کې د لوړو زده کړو سرپرست وزیر د روژې مبارکې میاشتې د فضیلتونو په اړه خبرې وکړې او ویې ویل چې د روژې مبارکه میاشت د صبر، اخلاص او صدقې میاشت ده او پکار ده چې د اسلام د احکامو سره سم له بې وزلو مسلمانانو سره مرسته وشي.
محترم شیخ صاحب همدارنګه د رهبري شورا غړو او د لوړو زده کړو وزارت ټولو کارکوونکو څخه وغوښتل چې خپل کار په صبر ترسره کړي او د کارکوونکو ترمنځ یې په متقابل احترام او ښه چلند ټینګار وکړ، څو په کاري چارو کې لا زیاته همغږي رامنځته او د وزارت ټاکل شوي اهداف ترلاسه شي.
ورپسې د تېرې شورا پرېکړو ته تر کتنې وروسته د اجنداء سره سم د هغو تحصیلي نهادونو چې د اعتبار پنځه کلنه موده یې بشپړه شوې وه، د (۱۴۰۴ هـ.ش) د ماسټري برنامو لپاره د کانکور ازموینې پر څرنګوالي او تیارۍ او یو شمېر نورو مهمو موضوعاتو بحث او اړینې پرېکړې وشوې.
نېټه: سه شنبه
۱۴۴۶ هـ.ق د رمضان المبارک ۴ مه
۱۴۰۳ هـ.ش د کب ۱۴ مه
۲۰۲۵ م د مارچ ۴ مه
