د مسلکي پراختيا 6 مرکزونو د جوړولو تړون لاسليک شو
د هیواد څلورو ولایتي پوهنتونونو کې د مسلکي پراختیا (PDC) شپږو مرکزونو جوړولو تړون، د لوړو زده کړو وزارت مالي او اداري مرستیال نور احمد دروېش او ګټونکې کمپنۍ تر منځ لاسلیک شو.
د لوړو زده کړو وزارت مالي او اداري معین د یاد تړون د لاسلیکولو پر مهال وویل؛ چې د مسلکي پراختیا مرکزونو جوړولو اساسي موخه د هیواد د تحصیلي بنسټونو اکاډمیک مدیریت او رهبرۍ د مهارتونو لوړول دي.
نوموړي د تړون تطبیقکوونکې کمپنۍ څخه وغوښتل چې په ټاکلې موده کې د یاد تړون کار پای ته رسولو تر څنګ د هغه کیفیت ته هم جدي پام وکړي.
د ګټونکي شرکت مسوول هم ژمنه وکړه چې نوموړې پروژه به د تړون شرایطو مطابق او ټاکل شویو معیارونو په پام کې نیولو سره پای ته ورسوي.
د لوړو زده کړو وزارت د تدارکاتو رییس عبدالله صوفي زاده په وینا؛ ددغې پروژې ټول لګښت ۱۷ میلیونه او ۸۲۵ زره افغانۍ دی چې د لوړو زده کړو وزارت له بودجې ورکول کېږي.
د یادونې وړ ده چې تر دې مهاله د افغانستان د کرنیزو علومو او ټکنالوژۍ ملي پوهنتون (کندهار)، غزني، د غزني انجنیري، هلمند، نیمروز او وردګ تحصیلي بنسټونو سربېره د هیواد په تحصیلي بنسټونو کې ۲۶ مرکزونه جوړ شوي چې د شپږو نویو په بشپړېدو سره به یې شمېر ۳۲ ته ورسېږي.
