د پوهنتونونو د لابراتوارونو تجهیزاتو کمیسیون پرانیستل شو
په لوړو زده کړو وزارت کې د مرکز او ولایتونو د تحصیلي بنسټونو د طبي او تخنیکي تجهیزاتو او لابراتوارونو د ستونزو څېړلو، مشخصولو او بیاکتنې په موخه یو کمېسیون جوړ شو.
د یاد کمېسیون پرانیستغونډه کې د لوړو زده کړو وزارت مالي او اداري معین نور احمد دروېش د نوموړي کمېسیون د جوړېدو موخه د هېواد په تحصیلي بنسټونو کې د معیاري لابراتوارونو برابرول او په تحصیلي بنسټونو کې د لابراتوارونو د ارزښت په ډاګه کول وبلل.
مالي او اداري معین زیاته کړه، چې په دې برخه کې د لوړو زده کړو وزارت د تدارکاتو ریاست د هېواد په پوهنتونونو کې د لابراتوارونو د ستونزو له منځه وړلو په اړه د یوه کمېسیون جوړولو طرحه وړاندې کړه چې له نېکه مرغه نن یې د پرانیستې شاهدان یو.
ورپسې د لوړو زده کړو وزارت د تدارکاتو رییس عبدالله صوفي زاده او د علمي پروګرامونو د پراختیا رییس پوهندوی علي جان عادل د وسایلو د کیفیت او د تحصیلي بنسټونو د لابراتوارونو د توحید او په هر پوهنځي کې د یوې کمېټې جوړولو پر اړتیا خبرې وکړې.
په پام کې ده چې د کمېسیون په راتلونکې غونډه کې د انجنیري، طب او کرنې پوهنځیو د اړتیا وړ لابراتواري وسایلو په اړه د کمېسیون غړو له خوا عملي ګامونه پورته شي.
د یاد کمېسیون غړو وروسته له یو لړ بحثونو څخه پرېکړه وکړه چې په راتلونکې اونۍ کې به د انجنیري، طب او کرنې پوهنځیو د اړتیا وړ لابراتواري وسایلو په اړه عملي ګامونه واخیستل شي.
د یادونې وړ ده چې په یاد کمېسیون کې د لوړو زده کړو وزارت مالي او اداري معین او یو شمېر رییسانو په ګډون د کابل، کابل طبي علومو، پولي تخنیک، هرات او کندهار پوهنتونونو استازي غړیتوب لري.
