د لوړو زده کړو وزارت سرپرست او علمي معین دوکتور لطف الله خیرخواه د ا.ا.ا او امریکا تر منځ د دوحې تاریخي تړون د دویمې کلیزې په مناسبت جوړې شوې ناستې ته خبرې وکړې.
۱۴۰۰کال، د کب ۱۰مه
د لوړو زده کړو وزارت سرپرست او علمي معین دوکتور لطف الله خیرخواه د ا.ا.ا او امریکا تر منځ د دوحې تاریخي تړون د دویمې کلیزې په مناسبت جوړې شوې ناستې ته خبرې وکړې.
د لوړو زده کړو وزارت علمي معین په یاده ناسته کې، چې د افغانستان ملي راډیو ټلویزیون له لوري جوړه شوې وه، ټولو افغانانو په ځانګړي ډول د تېرې ۲۰کلنې مبارزې مجاهدینو ته مبارکي وویله.
نوموړي وویل: «د اسلام سیاسي نظام په هر وخت او هر ځای کې د پلي کېدو وړ دی.» او زیاته یې کړه څومره چې امریکا د وسایلو له پلوه زوروره وه، په هماغه کچه افغانان کمزوري وو، خو د الله تعالی نصرت او د مجاهدینو د اېمان زور د دې لامل شول، چې مغروروه امریکا په ګونډو کړي.
دوکتور لطف الله خیرخواه وویل، چې اوسمهال په افغانستان کې د امریکا پوځي جګړه پای ته رسېدلې، خو فکري جګړه یې لا هم دوام لري او ویې ویل چې موږ باید د الله تعالی د دغې نعمت شکر ادا کړو او تر ټولو ښه شکر دا دی، چې نعمت په سم ډول وکارول شي.
