پکتیا پوهنتون کې څلور پراختیايي پروژې افتتاح او د یوې پروژې د بنسټ ډبره کیښودل شوه
د لوړو زده کړو سرپرست وزیر او علمي مرستیال پوهنمل عبدالتواب بالاکرزي د خپلو ولایتي سفرونو په لړ کې دا ځل د پکتیا ولایت تحصیلي وضعیت څخه د لیدنې ترڅنګ؛ د ICT سنټر، لمریزې بریښنا سیسټم، د کیفیت د تضمین مرکز او د ۳۱۳ جریبه ځمکه، چې د ولسمشر هدایت پر اساس د پکتیا پوهنتون د پراختیا په موخه ځانګړې شوې وه، پرانیسته وکړه.
پوهنمل بالاکرزي په هغې غونډه کې چې د یادو پروژو د پرانستې په مناسبت د پکتیا پوهنتون د غونډو په تالار کې جوړه شوې وه، خبرې وکړې او ویې ویل: لوړو زده کړو وزارت د ولسمشر محمد اشرف غني د هغو ژمنو پر اساس چې د ولایتونو مشرانو سره یې د تحصیلي بنسټونو د پراختیا او نويو رشتو د ایجاد په اړه کړې وې، یادې غوښتنې وروسته له توحید او اولویت بندي څخه د یو ځانګړي وړاندیز په ترڅ کې جمهوري ریاست مقام ته وړاندې کړې، چې له نیکمرغه نوموړي غوښتنې د جلالتمآب ولسمشر له لوري منظورې شوې او په هغه کې پکتیا پوهنتون ته د کمپیوټر ساینس پوهنځی او کادري روغتون منظور شول.
نوموړي زیاته کړه: لوړو زده کړو وزارت ټولو تحصیلي بنسټونو سره د متوازن انکشاف پر اصل کار کوي او په دې برخه کې په بشپړ صداقت او عدالت ټولې پراختیايي پروژې د سیمې اړتیاوو او د خلکو غوښتنو سره سم، کیفیت ته په پام سره ټولو ولایتونو کې پلي کوي.
د لوړ زده کړو سرپرست وزیر یوځلي بیا د ښځو او انجونو پر تعلیم او تحصیل ټینګار وکړ او له ټولو پکتیاوالو په ځانګړې توګه له ولسي مشرانو او دیني عالمونو یې وغوښتل ترڅو په دې برخه کې غږ پورته کړي.
ښاغلي بالاکرزي د کیفیت په اړه وویل، چې د کمیت له اړخه د تحصیلي بنسټونو شمیر خورا پورته تللی، اوس اړینه ده چې کیفیت ته ډیره پاملرنه وشي او له شته سرچینو څخه په لوړه پیمانه ګټه پورته شي.
په غونډه کې د پکتیا والي شمیم خان کټوازي هم خبرې وکړې او د لوړو زده کړو وزارت له پاملرنې څخه چې د پکتیا پوهنتون ارتقا ته یې کړې مننه وکړه، نوموړي د پکتیا ولس په مشرۍ د یاد پوهنتون د لا پراختیا او پرمختګ په موخه یو لړ وړاندیزونه د لوړو زده کړو سرپرست وزیر مخې ته کیښودل.
د پکتیا پوهنتون رییس پوهندوی دکتور سید ولي جلالزي د نوموړي پوهنتون د پروژو په اړه وویل چې شاوخوا ۶۵۰ میلیونه افغانیو په لګښټ په دې پوهنتون کې پروژې تر کار لاندې دي.
نوموړي همداراز د پکتیا پوهنتون د لاسته راوړنو او ستونزو په اړه خبرې وکړې او له ولسمشر، لوړو زده کړو وزارت رهبري پلاوي او پکتیا والي څخه یې د پکتیا پوهنتون د بیا رغونې په برخه کې د ترسره کړو فعالیتونو له امله مننه وکړه.
د لوړو زده کړو پراخیتايي پروګرام (HEDP) رییس نور احمد درویش په پکتیا پوهنتون کې د هغو علمي او پراختیايي پروژو په اړه چې کارونه یې بشپړ شوي او یا هم په پلان کې دي اړین معلومات وړاندې کړل.
د لوړو زده کړو سرپرست او علمي مرستیال پوهنمل عبدالتواب بالاکرزي له پوهنتون څخه د لیدنې پرمهال د انجنیري پوهنځي د محصلانو له نندارتون څخه هم لیدنه وکړه او د هغوی په لاس جوړو شويو ودانیو موډلونه یې د ستاینې وړ وبلل او محصلان یې په یاده برخه کې نورو کارونو ته وهڅول.
پکتیا پوهنتون اوسمهال ۷ پوهنځي لري چې د ۲۰۵ تنو استادانو له خوا په کې ۷۱۱۴ تنو محصلانو ته چې ۲۴۰ تنه یې انجونې دي زده کړې ورکول کیږي.
د یادونې وړ ده چې پکتیا پوهنتون کې د پورته یادو شویو پروژو یوه برخه د لوړو زده کړو پراختيايي پروګرام (HEDP) لخوا او پاتې نورې يې د لوړو زده کړو وزارت له پراختيايي بودیجې څخه تمویليږي.
