معلوماتې ټکنالوژۍ څلورم ننداټون د لوړوزده کړو په وزارت کې جوړشو
د افغانستان د خلاقیت او نوښت په مرکز کې د معلوماتې ټيکنالوژۍ څلورم نندارتون د لوړو زده کړو وزارت د مقام او رهبرۍ هئيت په حضور کې نن ورځ نندارې ته وړاندې کړای شو.
په دغه نندارتون کې د لوړو زده کړو وزارت علمي مرستیال او سرپرست پوهنمل عبد التواب بالا کرزي، د محصلینو چارو مرستیال پوهاند دوکتور بری صدیقي، د لوړو زده کړو وزارت د مقام سلاکار پوهاند محمد عثمان بابري، د معلوماتي ټيکنالوژۍ د خلاقیتونو د مرکز رئیس دوکتور نذیر احمد پیروز، د احصايې او معلوماتو ریاست مرستیال عبدالباري یوسفي،د لومړۍ میرمنې د دفتر رئيسه میرمن زحل امرخیل، د چارو د ادارې د آی ټې رئیس حنیف غرنی او په ولسي جرګه کې د خلکو استازي مسعوده کروخیل ګډون کړی و.
د لوړو زده کړو وزارت علمي مرستیال او سرپرست پوهنمل عبدالتواب بالا کرزي ددې نندارتون د جوړیدو څخه د ستاينې په ترڅ کې الیکټرونیکي زده کړې یې د خدمتونو په وړاندې کولو کې د روڼتيا او چټکتیا لامل وبللې.
د لوړو زده کړو وزارت سرپرست وویل " د کانکور د ازموینې په برخه کې د ازموينو د ملې ادارې په روښانه لاسته راوړنې، د بورسونو د ازموینو په بهير کې روڼتيا او د نورو بیلابیلو برخو ډیجیټلي کول د ملي یووالي د حکومت د ښو لاسته راوړنو څخه دي."
پوهنمل عبدالتواب بالاکرزي د خلاقیت او نوښت را مینځته کولو د مرکز په وسیله د ځوانانو د وړتياوو د نوښت لپاره د معلوماتي ټيکنالوژۍ په برخه کې د پوهنتون دننه رقابت یو ښه فرصت یاد کړ ویې ویل چې په دې توګه سره کیدلی شي وړتیاوې پیدا کړو او نوی نسل زیات خوځښت او کار ته لیواله کړو. د لوړو زده کړو وزیر پکتیا پوهنتون ته د خپل دوه ورځني سفر ته په اشارې سره وویل: " پکتیا پوهنتون کې د معلوماتي ټيکنالوژۍ په برخه کې نوي بدلونونه تر سترګو کیږي چې هیله بښونکي دي."
د معلوماتي ټيکنالوژۍ د خلاقیتونو د مرکز رئیس ډاکټر نذیر پیروز د څلورمې دورې د نندارتون له جوړولو څخه موخه د آزاد بازار، پوهنتونو او ددې مرکز تر مینځ د پل جوړول وبلل او ویې ویل چې د وروستیو ۱۸ کلونو په ترڅ کې په بیلا بیلو اقتصادي، اداري او تحصیلي برخو کې د نوې ټيکنالوژۍ څخه په ګټې اخیستنې سره د پرمختګ ښې زمينې برابرې شوېدي.
په دې نندارتون کې د لومړۍ میرمنې د دفتر رئیسې میرمن زحل امرخیل د خپلو خبرو په ترڅ کې نوې ټيکنالوژۍ د پر مختللو ټولنو د ژوند کولو سره تړلې برخه وبلله او زیاته یې کړه سره له دې چې ټيکنالوژي د بشر په ژوند کې آسانتياوې را مینځته کړي دي خو افغانستان د هغو له ګټو څخه په صحیح توګه سره برخمن شوی نه دی او اوس هم یو ډيجيټلي حکومت ته د رسيدلو لپاره زیات کار ته اړتیا شته دی.
د خلاقیت او نوښت مرکز د دولتي پوهنتونو د معلوماتي ټيکنالوژۍ د پوهنځیو تر مینځ د یو آزاد رقابت په لاره اچولو سره د ۵۴ پروژو څخه ۲۰ پروژې د خپلو خلاقیتونو د رقابت او نندارې لپاره په دې مرکز کې را ټولې کړېدي.
دغه برنامه تر دوو ورځو پورې دوام لري او د رقابتي ۲۰ پروژو له مینځه د ژورې هئيت له لوري ۵ پروژې د برياليو پروژو په عنوان ټاکل کیږي.
