د لوړو زده کړو وزارت علمي معین دوکتور لطف الله خیرخواه د شمال شرقي ولایتونو د تحصیلي بنسټونو د څارنې په موخه د خپل سفر په دوام کې له تخار پوهنتون څخه د لیدنې تر څنګ، د دغه پوهنتون مختلفې برخې یې وارزولې.
د لوړو زده کړو وزارت علمي معین د تخار پوهنتون له مختلفو برخو د لیدنې تر څنګ، د دغه پوهنتون له رهبري پلاوي، استادانو، محصلینو او کارکوونکو سره په ناسته کې د یاد پوهنتون د ستونزو پر حل او پرمختګ خبرې وکړې.
په یاده لیدنه کې د تخار پوهنتون رئیس قاري محمد بشیر مجاهد او د دغه پوهنتون یو شمېر نورو مسؤلینو تخار ولایت ته د لوړو زده کړو وزارت علمي معین په ورتګ خوښي وښوده او په تخار پوهنتون کې یې د خپلو کاري پروګرامونو، موخو، فعالیتونو، لاسته راوړنو او اړتیاوو خبرې وکړې او د خپلې غوښتنې او وړاندیزونه یې د لوړو زده کړو وزارت له علمي معین سره شریکې کړې.
د لوړو زده کړو وزارت علمي معین دوکتور لطف الله خیرخواه د ویناوالو او تخار پوهنتون د مسؤلینو د خبرو له اورېدو وروسته د یاد پوهنتون د اړتیاوو او وړاندیزونه په اړه تفصیلي خبرې وکړې او ویې ویل چې ټولې اړتیاوې او وړاندیزونه به په لوړو زده کړو وزارت کې مطرح کړي او د اړتیاوو پوره کولو او وړاندیزونو د عملي کولو په برخه کې به هڅې وکړي.
همدارنګه د لوړو زده کړو وزارت علمي معین دوکتور لطف الله خیرخواه تخار ولایت ته د سفر په جریان کې د دغه ولایت له مرستیال والي سره وکتل او د تخار پوهنتون اړوند مسایلو یې خبرې ورسره وکړې.
