د لوړو زده کړو وزارت د څارنې او ارزونې ریاست د رئیس په مشرۍ د دغه وزارت پلاوي د هرات له امارتي او ځینو خصوصي تحصيلي بنسټونو څخه څارنه او لیدنه وکړه:
د څارنې او ارزونې رئیس انجینر سید اسماعیل روحاني په مشرۍ د علمي برنامو د پراختیا ریاست، د تضمین کیفیت او اعتبار ورکونې ریاست، د داخلي پلټنې ریاست، د فوق لېسانس کمېسیون او علمي بورډ د غړو ګډ پلاوي د یادو تحصیلي بنسټونو علمي، تدریسي، اداري او فوق لېسانس برنامو اړوندې چارې وارزولې.
نوموړي پلاوي د یوې اونۍ په جریان کې د هرات ولایت د امارتي پوهنتون سربېره د جامي خصوصي پوهنتون، د خواجه عبدالله انصاري، کهکشان شرق او عاطفي لوړو زده کړو خصوصي مؤسسو له بېلا بېلو تدریسي او اداري چارو څارنه او ارزونه وکړه او په اړوندو برخو کې یې لازمې سپارښتنې ورته وکړې.
همدارنګه یاد پلاوي د امارتي او خصوصي پوهنتونونو د استاذانو لپاره په درې ورځني دیني ـ علمي سمینار کې د ګډون سربېره استاذانو او د سمینار ګډونوالو ته د لوړو زده کړو وزارت په لاسته راوړنو او پرمختګونو خبرې وکړې او د علمي پرمختګ په برخه کې د وزارت لخوا د پوره همکارۍ او ملاتړ ډاډ ورکړ.
