د لوړو زده کړو سرپرست وزیر د هرات پوهنتون د ۱۴۰۲ هـ ش کال د ۱۲۴۴ محصلینو په فراغت غونډه کې د ګډون تر څنګ، د هرات پوهنتون کرنې پوهنځی ماسټري برنامه افتتاح او د دغه پوهنتون داخلي سړکونه یې ګټې اخیستنې ته وسپارل.
د لوړو زده کړو سرپرست وزیر، په داسې حال کې چې د یاد پوهنتون مشرتابه پلاوي او د هرات ولایتي ادارې مسؤلینو هم حضور درلود، فارغېدونکو محصلینو ته د مبارکۍ تر څنګ، د علم او اسلامي کلتور پر ارزښت او له دښمنانو سره پر فکري مبارزې خبرې وکړې.
نوموړي محصلینو ته وویل چې له اړتیا سره سم به په هېواد کې د ماستري او دوکتورا برنامې ورته ایجادوي او یو ځل بیا یې پر بهر ته تللو استادانو غږ وکړ چې هېواد ته راشي او د خپلو بچیانو روزنه وکړي.
هغه په پوهنتونونو کې د متعهد، متخصص او با اېمانه ځوان نسل پر روزنې ټینګار وکړ او ویې ویل: "اسلامي امارت د تعلیمي او تحصیلي مرکزونو، پوهانو او متخصصینو ملاتړ کوي، په علمي او رغنیزو چارو کې یې مشورې او نظرونه اوري او عملي کوي یې."
د لوړو زده کړو سرپرست وزیر په یاده غونډه کې د هرات پوهنتون د لابراتوارونو، کتابتونونو، علمي برنامو او ودانیو د جوړونې او تجهیز ژمنه وکړه.
د غونډې په پای کې فارغېدونکو محصلینو ته تصدیق پاڼې ووېشل شوې.
