د پکتيا پوهنتون ۸۰ خالي اداري بستونو لپاره د ۲۷ ښځينه وو په ګډون د۱۰۰۰ تنو نوماندانو څخه رقابتي ازموینه واخیستل شوه.
یاده ازموینه د لوړو زده کړو وزارت پلاوي له لوري، چې د امتحاناتو د کميټې مشر او د یاد وزارت د اطلاعاتو، نشراتو او عامه اړيکو رئيس روح الله روحاني يې مشري کوله، د یادې کمېيټې غړو او د پوهنتون مسؤلينو په شتون کې واخېستل شوه.
په پیل کې پکتیا پوهنتون رئیس مولوي عبدالحکیم حمدي د لوړو زده کړو وزارت څخه راغلي پلاوي ته د ښه راغلاست ویلو ترڅنګ ګډون والو ته په ازموینو کې د بشپړ شفافیت ډاډ ورکړ.
ورپسې د لوړو زده کړو وزارت د امتحاناتو کمېټې مشر او د دې وزارت د اطلاعاتو، نشراتو او عامه اړیکو رئیس انجنیر روح الله روحاني خبرې وکړي او د ازموينې ګډونوال ته يې د بشپړ عدالت د تامين ډاډ رکولو ترڅنګ وویل، چې وړ کسان به د خپل استعداد پر بنسټ خالي بستونو ته لار پیدا کړي.
