د لوړو زده کړو سرپرست وزیر پکتیا ولایت ته د خپل رسمي سفر په ترڅ کې د پکتیا پوهنتون څخه لیدنه وکړه
د لوړو زده کړو سرپرست وزیر شیخ الحدیث مولوي نداء محمد ندیم او ورسره مل پلاوي پکتیا ولایت ته د سفر پر مهال په پکتیا پوهنتون کې یوې لویې غونډې ته چې د دغه ولایت مرستیال والي شیخ انعام الله صلاح الدین، د پوهنتون رهبري پلاوي، د ولایتي ادارو مسؤلینو، استادانو او محصلینو هم پکې ګډون درلود وینا وکړه.
د لوړو زده کړو سرپرست وزیر وویل: چې د ټولو مسؤلینو، استادانو او محصلینو د مبارزې هدف حق ترلاسه کول دي او د غونډې له نورو ګډونوالو یې وغوښتل، چې د حق ترلاسه کولو په لاره کې له یو بل سره همکاري وکړي.
هغه د علم پر ارزښت هم خبرې وکړې او محصلین یې د عصري او دیني علومو زده کړې ته وهڅول او زیاته یې کړه: چې د یو هېواد پرمختګ او ترقي په علم او پوهې پورې اړه لري.
نوموړي د خپلو خبرو پر دوام استادانو او محصلینو ته سپارښتنه وکړه، چې خپلو درسونو کې غفلت ونه کړي او خپلو زده کړو ته پام وکړي، ځکه دوی د هېواد معنوي شتمني ده.
محترم وزیر صاحب همدارنګه استادانو ته په خپلو خبرو کې زیاته کړه: چې د هېواد د بچيانو په وړاندې خپل مسؤليتونه په ښه توګه سرته ورسوي او د اسلام د سپېڅلي دين او د هېواد د کلتور په رڼا کې روزنه ورکړي.
ورپسې د پکتيا پوهنتون رئيس مولوي عبدالحکيم حمدي د لوړو زده کړو سرپرست وزیر او ورسره مل پلاوي ته د ښه راغلاست ویلو ترڅنګ د دغه پوهنتون د فعاليتونو او لاسته راوړنو په اړه خبرې وکړې.
نېټه: دوشنبه
۱۴۴۶ هــ.ق د ربیع الثاني ۱۸ مه
۱۴۰۳ هـ.ش د میزان ۳۰ مه
۲۰۲۴ م د اکتوبر ۲۱ مه
